AALAJANGIUSSAQ
Ineqarneq pillugu Maalaaruteqarfik isumaqarpoq inigisavit XXX-XXX-XX, 39XX illoqarfimmi pineqartumi inissisimasup nalinginnaasumik aaqqissuunnera illit akiligassarigit.
Taamaattumik maalaaruteqarninni isumaqatigineqanngilatit.
Ineqarneq pillugu Maalaaruteqarfik maalaarutinnik suliaqarnissaminut piginnaatitaanngilaq, tamanna akiligassamut tunngasuusimappat.
Aalajangiineq Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq kingusinnerusukkut allannguuteqartoq naapertorlugu ingerlanneqarpoq.
Suliap uppernarsaatitai:
- Inimik attartornermi isumaqatigiissut 11. februar 2019-imik ulluligaq.
- Inip qimannerani misissuinermi nalunaarusiaq 24. april 2019 ulluligaq
- Illit 25. April 2019 maalaaruteqaatit
- Nuunneq pillugu naatsorsuineq 20. August 2019 ulluligaq
- Inissiaatileqatigiiffiup mail-ikkut allagaa 11. oktober 2019 ulluligaq
- Illit Inissiaatileqatigiiffimmut mail-ikkut allakkat 16. Oktober 2019 ulluligaq
- Inissiaatileqatigiiffiup mail-ikkut allagaa 5. december 2019 ulluligaq
Nalunaarusiaq:
Inimik attartornermut isumaqatigiissummi atuarneqarsinnaavoq inigisaq XXX-XXX-XX, 39XX illoqarfimmi pineqartumi inissisimasoq attartussallugu tigusimagit ulloq 12. Februar 2019.
Inissiaq 52,90 m²-iuvoq marlunnillu initaqarluni.
Inissiaq atorunnaarlugu nalunaarutigaat, ulloq 31. Maj 2019 qimanniarlugu, inissiamullu allamut uiit peqatigalugu nuullutit 9. April 2019.
Inissiamik misissuinermik nalunaarusiaq 24. April 2019 ulluligaq naapertorlugu iikkat qilaarlu ataasiarlugit qalipatassaapput, asatassaallutik allatullu suliassaallutik. Inimi ineeqqamilu naqqit sioralitassaapput ataasiarlugillu lakkigassaallutik, igaffimmilu naqqup linoleummia asatassaalluni suliassaallunilu. Ineeqqamittaaq, igaffimmi uffarfimmilu matserfiit sioralitassaapput marloriarlugillu lakkigassaallutik.
Inissiamik misissuinermi nalunaarusiaq ilinnit Inissiaatileqatigiiffiullu sinniisuanit atsiugaavoq ulloq 24. April 2019. Tassani atuarneqarsinnaavoq illit iluarsagassat suunerinik aningaasartuutitassaanillu ilisimatinneqarsimasutit.
Akiligassat allagartaat sisamaasut Suliffeqarfik XY-imeersut 26. Juli 2019 ullulikkat naapertorlugit naqqit suliarineri marluk qalipaanerillu marluk katillugit naligaat kr. 10291,90.
Nutsernermi naatsorsuinermi 20. august 2019 ullulikkami ersippoq Inissiaatileqatigiiffimmut akiitsoqartutit kr. 3769,90.
Akiitsut imatut pilerput: iluarsaassineq kr. 9060, nalinginnaasumik iluarsaassinermi ilanngaat
- 317,10, tassa nalinginnaasumik iluarsaassinerup 3,5 %-ia. Taamaattumik illit akiligassarilerpat kr. 8047,92. Tamatuma saniatigut inigisannut akiitsoqarputit kr. 4234. Taamaattumik Inissiaatileqatigiiffimmut akiitsutit tassaalerput kr. 12976,90 iserternermi akiliutaasartoq (depositum) ilanngaatigitinnagu. Ilanngaatigereerlugu Inissiaatileqatigiiffimmut akiligassatit tassaapput kr. 3769,90.
Ulloq 25. april 2019 akiligassatit pillugit maalaaruteqarputit.
Nalunaarutigaat nutserninnut atatillugu akiligassarilikkatit kr. 8742,90 naapertuutinngitsut, tassami qaammatit marluunngitsulluunniit inigisaq najorakku, aammalu inigisaq eqqiluitsuutikkakku.
Aammattaaq maalaarutinni ilisimatitsissutigaat inissiaq qaliparlaajusoq iserterfigalugu, qimakkakkulu suli taamatut isikkoqarluni.
Ilanngullugu maalaarutinni nalunaarutigaat inimi iikkani putuliorsimallutit sisamanik, qilaami marlunnik, gangimi marlunnik igaffimmilu marlunnik.
Inissiaatileqatigiiffiup ulloq 11. oktober 2019 mail-ikkut allagaani atuarneqarsinnaavoq, misissuinermi natermi kigartornernik nassaartoqarsimasoq, Inissiaatileqatigiiffiuttaaq nalunaarutigaa tamanna naqqup lakkertariaqalerneranut patsisaasoq.
Illit 16. oktober 2019 mail-ikkut allagaqarninni ilanngullugu nalunaarutigaat natermi kigartuisimanak, tamannalu kingusinnerusukkut aatsaat tusarsimallugu.
Inissiaatileqatigiiffiup ulloq 5. december 2019 Ineqarneq pillugu Maalaaruteqarfimmut nalunaarutigaa illit inissiamut iserterninni amigaatit allattorsimaffiannik tunniussisimanngitsutit.
Inatsisit toqqammavigineqartut:
Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq § 45 imm. 3 naapertorlugu piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit.
- § 77 naapertorlugu inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iiganik qalipaaneq aamma/imaluunniit ungalitsersuineq kiisalu eqqiaaneq. Natii nutaamik lakkersimasutut isikkoqassapput, taamaattorli tak. imm. 3.
- § 78 naapertorlugu attartortitsisup § 77 malillugu nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai. Piffissaliussatut aalajangiunneqartup naannginnerani inissiamit anisoqarnerani attartortup taamaallaat aningaasat piffissami tassani attartortitsinerup atorunnaarfigisaani attartortitsisumit akilerneqartussanngorsimanngitsut akilissavai.
- § 79 naapertorlugu attartortitsineq atorunnaarsinneqartussanngorsimappat imaluunniit inissiaq allamik pissuteqartumik qimanneqartussanngorsimappat attartortitsisup attartortullu piffissaq qimatsivissaq inissiamillu misissuisoqarnissaa allaganngorlugu isumaqatigiissutigissavaat. Attartortoq immikkut ilisimasalimmik ilaqarluni misissuinermut peqataanissamut pisinnaatitaavoq. Attartortitsisup sivikinnerpaamik ullunik arfineq-marlunnik siumut ilisimatitsinermigut attartortoq misissuinermut peqataaqqullugu noqqaaffigissavaa.
Imm. 2 naapertorlugu misissuinermi attartortitsisoq misissuisimanermut nalunaarusiussaaq, tassanilu amigaataasinnaasut paarinerlutallu attartortitsisup isumaa malillugu attartortup akisussaaffigisassai allassimassapput. Attartortoq taakkununnga isumaqataanngippat, tamanna attartortup isumai taallugit nalunaarusiami allanneqassapput. Nalunaarusiaq misissuinermut atatillugu illuatungeriinnit atsiorneqassaaq. Attartortoq taannaluunniit sinnerlugu takkuttoq misissuinermut nalunaarusiap assinganik tunineqassaaq. Tamatuma kingorna attartortup tamanna piumasarippagu, pissutissaqanngitsumik uninnganertaqanngitsumik suliassat attartortitsisup isumaa malillugu attartortumit akilerneqartussanut suliassat qanoq akeqarnissaanik missingersuummik allakkatigut nalunaarfigineqassaaq.
- § 84-mi atuarneqarsinnaavoq Inuigisaq pillugu Maalaaruteqarfiup attartortumit maalaarutit makkununnga tunngasut suliarisarai:
1) Ineqarnermut akiliutinik qaffaanissamik siumoortumik ilisimatitsisarnermi piumasarisat, tak. § 28, imm. 2.
2) Aserfallatsaaliuineq iluarsaassinerlu, tak. § 45.
3) Inissiap iserterfigineqarnerani qanoq issusia, tak. § 47.
4) Attartukkami atortut ikkussukkat pitsanngorsaanerillu (atuisinnaatitaaneq), tak. §§ 51 aamma 55. 5) Attartortup attartukkaminik atuinera (torersaarnissamik malittarisassanik unioqqutitisinerit), tak. § 50.
6) Atuisinnaatitaanerup allanut tunniunneqarnera (inissianik paalaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq), tak. §§ 58-62.
7) Inissiamit aninermi inissiap qanoq issusia (iluarsaassineq nalinginnaasoq), tak. § 77.
Aalajangersagaq tamakkiisuuvoq.
Peqqussummi § 85 naapertorlugu Ineqarneq pillugu maalaaruteqarfiup maalaarut, maalaaruteqartarfimmi suliarineqarnissamut naleqqutinngitsutut nalilerneqartoq suliarinissaa itigartissavaa.
Aalajangersakkat Peqqussummi tamakkiisumik ilanngunneqarput.
Naliliineq:
Maalaaruteqarfik isumaqarpoq inissiap nalinginnaasumik iluarsarneqarnerani aningaasartuutit illit akiligassarigitit.
Aalajangiinermi patsisigineqarpoq inissiamit aninermi nalinginnaasumik iluarsaanerit pisussaammata, taakkununnga ilaallutik qilaat iluarsaanneri, iikkat qalipanneri/tapet-ilersorneri eqqiaanerlu. Naqqit nutaamik lakkerneqassapput.
Ineqarneq pillugu Maalaaruteqarfiup pingaartissimavaa inigisamik attartornermi isumaqatigiissut allatut isumaqatigiissuteqarnernik nalinginnaasumik iluarsaanissamut piumasaqaatit avaqqullugit imaqassanngitsoq. Inissiamik misissuinermi nalunaarusiami atsiorsimasanni allassimasoqanngilaq naqqit lakkernissaanut akerliusimasutit.
Ineqarneq pillugu Maalaaruteqarfiup maluginiarpaa Ineqarneq pillugu Peqqussummi nalinginnaasumik iluarsaassinissamut piumasaqaatinik avaqqutaarinissamut periarfissaqanngitsoq.
Tamatumani aaqqiineq Peqqussummi § 78 naapertorlugu ingerlanneqarpoq, taamaalilluni attartortoq iluarsaassinerni nalinginnaasuni aningaasartuutinik kigaatsumik tigusiartuaassalluni qanoq sivisutigisumik inissiami najugaqarsimaneq naapertorlugu. Taamaalilluni attartortoq sivikinnerpaamik qaammatini 100-ni najugaqarsimaguni aatsaat nalinginnaasumik iluarsaassinerit aningaasartuutaannik tigusissalluni.
Tassa imaappoq, ilinnut tunngatillugu nalinginnaasumik iluarsaassinermi aningaasartuutit 3,5 %-ii ilanngaatigineqarsimapput, inissiami najugaqarnerpit qaammatinik 3,5-inik sivisussuseqarneranut naapertuuttunik. Aningaasat annertussusaat naatsorsuusiami ersipput.
Ineqarneq pillugu Maalaaruteqarfik inissiani najugaqarnermut qaammmammut akiliutaasartunut isummernissaminut pisinnaatitaaffeqannginnami maalaarutit qaammammut ataatsimut akileqqitassamut tunngasoq suliarisinnaanngilaa.
Aalajangiineq:
Inissiaatileqatigiiffiup YY-ip nalinginnaasumik iluarsaanermut tunngasoq pillugu aalajangiussaa Ineqarneq pillugu Maalaaruteqarfimmit atortinneqarpoq. Ineqarneq pillugu Maalaaruteqarfik inigisamut akiliutaasartut pillugit maalaarutinik suliaqarnissamut pisinnaatitaaffeqanngilaq.
Ineqarneq pillugu Maalaaruteqarfiup aalajangiineri Namminersornerullutik Oqartussanut kommunenullu, inissianik attartortitsisuusunut pinngitsoorani malinneqassapput, § 86 malillugu.
Maalaarnissamut ilitsersuut:
Ineqarneq pillugu Maalaaruteqarfiup aalajangiussaa allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq, Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq § 86 imm. 7 malillugu.
Ineqarneq pillugu Maalaaruteqarfiup aalajangiussaata eqqartuussivimmut ingerlateqqinneqarnissaa kissaatigineqarpat. Attartortitsisoq, tassa Namminersorlutik Oqartussat Kommuniluunniit, pillugu suliassaq Kalaallit Nunaanni Eqqartuussiveqarfimmut tunniunneqassaaq.
Inussiarnersumik inuulluaqqusilluta
Naja Joelsen
Ineqarneq pillugu Maalaaruteqarfimmi siulittaasoq
Allakkap assilinera: Inissiaatileqatigiifimmut YY-mut, attartorneq nr. XX-XX-XX-XX
lnatsisit toqqammaviit:
lnissianik attartortitsisarneq pillugu lnatsisartut peqqussutaat nr. 2, 12. maj 2005-imeersoq kingusinnerusukkullu allannguutai ilanngullugit
- § 45. Namminersornerullutik Oqartussat kommuunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigaa.
Imm. 2. Avammut kuuffinnut, kiassarnermut, innaallagissamut, gassimut imermullu teknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikiussat, matserfiit, kiassaatit, ruujorit, sikaaviit alaakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnikkut pisoqalinikkullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.
Imm. 3.Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit.
- § 47. Attartortitsisup attartorneqartoq piffissamit attartornissap aallartiffissaaniit pitsaasumik isumannaatasumillu pitsaassuseqartillugu attartortumut atugassanngortissavaa. Iikkat, qilaat naqqillu nalinginnaasumik iluarsaanneqarsimassapput, tak. § 77, imm. 1. Attartugassaq eqqiarneqarsimassaaq uumasuaraqassananilu, igalaat, sikaaviit matui aamma matut ilivitsuussapput atorsinnaasunillu paarnaarsaateqassallutik. Kiisalu matut silarliit tamarmik immikkut marlunnik matuersaateqassapput, teknikikkullu atortulersuutit ajoquteqassanatik.
Imm. 2. Inissiamut iserternissamut atatillugu attartortitsisup attartortoq taannaluunniit sinnerlugu takkuttoq ilagalugu inissiaq takuniassavaat inissiamullu iserternermut nalunaarusiussallutik, taassumalu assilineranik attartortoq tunineqassaaq, taamaattorli tak. imm. 5. Takuniaanermi amigaatit malugineqartut inissiamut iserternermut nalunaarusiamut ilanngunneqassapput.
Imm. 3. Amigaatit allat, attartortup inissiamut iserternermi kingorna tigusinermut atatillugu tikkuarsutai inissiamut iserternermiit sapaatit akunneri marluk qaangiutsinnagit allakkatigut attartortitsisumut nalunaarutigineqassapput. Amigaatilli nalinginnaasumik misissuinermi takuneqarsinnaasimanngippata imaluunniit attartortitsisoq peqquserlussimappat tamanna atuutissanngilaq.
Imm. 4. Imm. 2-mi aamma 3-mi maleruagassat attartortumut ajoqutaasumik isumaqatigiissuteqarnikkut sanioqqunneqarsinnaanngillat.
Imm. 5. Inissiamut iserternissamut atatillugu misissuinissamut aningaasartuutissat annertuallaarpata, inissiamut iserternissamut atatillugu takuniaaneq pinngitsoorneqarsinnaavoq.
!mm. 4. 1mm. 2-mi aamma 3-mi maleruagassat attartortumut ajoqutaasumik isumaqatigiissuteqarnikkut sanioqqunneqarsinnaanngillat.
/mm. 5. lnissiamut iserternissamut atatillugu misissuinissamut aningaasartuutissat annertuallaarpata, inissiamut iserternissamut atatillugu takuniaaneq pinngitsoorneqarsinnaavoq.
- § 77. Inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iiganik qalipaaneq aamma/imaluunniit ungalitsersuineq kiisalu eqqiaaneq. Natii nutaamik lakkersimasutut isikkoqassapput, taamaattorli tak. imm. 3.
Imm. 2. Attartortup nammineerluni nuunnerminut atatillugu nalinginnaasumik iluarsaassinissani kissaatigippagu, iluarsaassineq assassornermik ilinniagaqarsimasutut illersorneqarsinnaasumik pitsaassuseqartillugu suliarineqassaaq. Attartornermik unitsitsinissaq imaluunnit atorunnaarsitsinissaq naapertorlugu inissiap qimanneqarnissaa, inissiap takuniarneqarnissaa sioqqullugu suliaq naammassereersimassaaq, tak. § 79.
Imm. 3. Attartortup inissiamut iserternerani inissiaq nalinginnaasumik iluarsaanneqarsimanngippat, attartortup inissiaq iserternermini pissuserisaatut itsillugu tunniutissavaa.
Imm. 4. Attartortitsisup imm. 1-imi aamma 2-mi aalajangersakkat sanioqqussinnaavai, attartornerup atorunnaarnerata nutaamillu aallartitsinerup kingorna inissiap iluarsaanneqarnissaa annertuunik ajornartorsiutitaqarpat. Attartornerup atorunnaarnerani tamatumunnga taarsiullugu attartortoq inissiamik attartornerup nalaani nungullarnernut naleqquttumik annertussusilinnik akiliuteqassaaq. Akiliutissaq qaammammut ataatsimut inimut ataatsimut 50 kr.-inik annertussuseqarpoq. Attartortitsisup nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai.
Imm. 5. Naalakkersuisut inissiamit aninermi nalinginnaasumik iluarsaassisarneq aamma attartortup tamatumunnga atatillugu aningaasartuutigisaanut ajunngitsorsiassaqartarneq pillugu maleruagassiorsinnaapput.
- § 78. Attartortitsisup § 77 malillugu nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai. Piffissaliussatut aalajangiunneqartup naannginnerani inissiamit anisoqarnerani attartortup taamaallaat aningaasat piffissami tassani attartortitsinerup atorunnaarfigisaani attartortitsisumit akilerneqartussanngorsimanngitsut akilissavai.
- § 79. Attartortitsineq atorunnaarsinneqartussanngorsimappat imaluunniit inissiaq allamik pissuteqartumik qimanneqartussanngorsimappat attartortitsisup attartortullu piffissaq qimatsivissaq inissiamillu misissuisoqarnissaa allaganngorlugu isumaqatigiissutigissavaat. Attartortoq immikkut ilisimasalimmik ilaqarluni misissuinermut peqataanissamut pisinnaatitaavoq. Attartortitsisup sivikinnerpaamik ullunik arfineq-marlunnik siumut ilisimatitsinermigut attartortoq misissuinermut peqataaqqullugu noqqaaffigissavaa.
Imm. 2. Misissuinermi attartortitsisoq misissuisimanermut nalunaarusiussaaq, tassanilu amigaataasinnaasut paarinerlutallu attartortitsisup isumaa malillugu attartortup akisussaaffigisassai allassimassapput. Attartortoq taakkununnga isumaqataanngippat, tamanna attartortup isumai taallugit nalunaarusiami allanneqassapput. Nalunaarusiaq misissuinermut atatillugu illuatungeriinnit atsiorneqassaaq. Attartortoq taannaluunniit sinnerlugu takkuttoq misissuinermut nalunaarusiap assinganik tunineqassaaq. Tamatuma kingorna attartortup tamanna piumasarippagu, pissutissaqanngitsumik uninnganertaqanngitsumik suliassat attartortitsisup isumaa malillugu attartortumit akilerneqartussanut suliassat qanoq akeqarnissaanik missingersuummik allakkatigut nalunaarfigineqassaaq.
Imm. 3. Attartortup inissiamik qimatsinissani kingusinnerpaamik ullunik arfineq-pingasunik sioqqullugu najugaq nalunaarutit nassiunneqartarfissaat nalunaarutigissavaa.
- § 84. Ineqarneq pillugu maalaaruteqartarfiup attartortut maalaarutaat makkununnga tunngasut suliarisarpai:
1) Ineqarnermut akiliutinik qaffaanissamik siumoortumik ilisimatitsisarnermi piumasarisat, tak. § 28, imm. 2.
2) Aserfallatsaaliuineq iluarsaassinerlu, tak. § 45.
3) Inissiap iserterfigineqarnerani qanoq issusia, tak. § 47.
4) Attartukkami atortut ikkussukkat pitsanngorsaanerillu (atuisinnaatitaaneq), tak. §§ 51 aamma 55.
5) Attartortup attartukkaminik atuinera (torersaarnissamik malittarisassanik unioqqutitisinerit), tak. § 50.
6) Atuisinnaatitaanerup allanut tunniunneqarnera (inissianik paalaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq), tak. §§ 58-62.
7) Inissiamit aninermi inissiap qanoq issusia (iluarsaassineq nalinginnaasoq), tak. § 77.
Imm. 2. Maalaarutit ineqarneq pillugu maalaaruteqartarfimmut allaganngorlugit tunniunneqartassapput, aammalu maalaaruteqartup maalaaruteqartarfiup sumik isummerfigisaqarnissaanut kissaataanik erseqqissaassummik imaqassalluni. Maalaarummut pissutsinut attartortup suliaritikkusutaanut uppernarsaatissat pisariaqartinneqartut ilaatinneqassapput.
Imm. 3. Maalaarutip ineqarneq pillugu maalaaruteqartarfimmi suliarineqarnissaanut attartortoq annerpaamik 500 kr.-inik sullissinermut akiliummik akiliuteqartinneqassaaq. Maalaaruteqartoq maalaarutigineqartoq pillugu taperserneqarpat imaluunniit suliaq ineqarnermut maalaaruteqartarfimmi suliarineqarnissaminut naleqqutinngitsutut itigartinneqarpat aningaasat sullissinermut akiliutigineqartut maalaaruteqartumut utertinneqassapput.
Imm.4. Attartortup suliaq eqqartuussivinnut suliakkiissutigineqareersoq ineqarneq pillugu maalaaruteqartarfimmut suliakkiissutigineqarnissaa kissaatigippagu, maalaaruteqartarfik maalaarutip suliarinissaanut itigartitsissaaq.