Pisinerup atorunnaarnera

Pisineq atorunnaassappat nioqqutissaq tigoqqissavat, aammalu pisiniartup aningaasaatini utertissavai. Pisiniartup aningaasat nioqqutissamut akiliutiginikuusani tigoqqissavai.

Tamanna atuuppoq nioqqutissaq akitsorsimangaluarpalluunniit imaluunniit akikillisimangaluarpat. Aammattaaq atuuppoq qnalikillisimangaluarpat atuisartup naliginnaasumik atuinerata malittarisaanik.

Ataasiakkaani pisuni pisinnaatitaaffeqassaatit aningaasat annertussusaat ilanngaatigissallugu iluaqutissartaata nalinganut atuisartup pigisimasaanut.

Arlalinnik nioqqutissanik ataatsikkut pisisoqarsimappat

Nioqqutissaq ataatsimoortitsilluni pisinermut ilaappat niuerneq tamaat atorunnaarsitaariaannaavoq, naak nioqqutissaq ataasiinnaq ajoquteqaraluarpat. Soorlu assersuutigalugu nerriviusinnaavoq arfinilinnit issiavittalik, atisat qarlittallit, kajaavaq aaqanngitsorlu imaluunniit nalaasaarfiit assigiit marluk.

Taamaallaat ataatsimoortillugit pisinerussaaq ataatsikkut pisiarineqarsimappata. Nioqqutissat aammattaaq ataqatigiissuseqassapput.

Kisianni nioqqutissat imminnut attuumassuteqanngippata pisiniartup taamaallaat nioqqutissamut kukkuneqartumut pisineq atorunnaarsissinnaavaa. Soorlu assersuutigalugu pisiniartup nerrivik, qullerlu kanaartalik aammalu siniffik meeqqat sinittarfianut pisiarisimappagu.

Aningaasat – pisissutissamut uppernarsaataanngillat

Pisiniartup aningaasaatini utertissavai. Tamaasillutit pisissutissamik uppernarsaammik tunisisinnaanngilatit pisineq atorunnaarsinneqarpat, pissutigalugu nioqqutissaq amigaateqarsimappat.

Nioqqutissap utertinnissaa itigartitsissutigisinnaavat pisiniartup aserorsimappagut naliginnaasumik atornissaa kingunerisinnaasaanik allatut. Soorlu assersuutigalugu qarasaasiaasinnaavoq nakkaaneqarsimasoq, imaluunniit kamiit paarilluarneqangitsut nungullarnikulluunniit. Taamaattoqartillugu atuisartoq pisiap akianik akikilliliiffigineqarsinnaavoq.

Kisianni nioqqutissap utertinnissaa itigartitsissutigisinnaanngilat nioqqutissami pisiniartumiit asorneqarsimasoq ajornanngitsumik akikitsumillu taarserneqarsinnaappat imaluunniit aaqqinneqarsinnaappat. Taamannak pisoqartillugu aaqqissortinneranut aningaasartuutit aningaasaniit ilanngaataasinnaavoq pisiniartup tigusassaaniit.

Piumasarisinnaavat nioqqutissaq tamakkerlugu tigoqqinnissaa. Assersuutigalugu qarasaasiaq utertinneqassaaq atortui tamaasa ilanngullugit. Kisianni piumasarisinnaanngilat poortuutissartai, ilitsersuutai imaluunniit allat pappiarartai tigoqqissallugit.

Scroll to Top