Kiffartuussinerit: Neqeroorut akialu

Pisiniartorlu suliap annertussusaanut akianullu ersarissumik isumaqatigiissusioritsi. Aqqutaani isumaqatigiissut allanngussappat, aammalu akianut sunniuteqarluni ersarissumik pisiniartoq paasitissavat.

Neqeroorut imaluunniit missingersuineq?

Neqeroorut unioqqutinneqartussaanngilaq aammalu malittarisatut pingaarnertut allanngortinneqarsinnaanani. Taamaasillutit kingusinnerusukkut piumasaqarsinnaanngilatit qaffasinnerusumik akiliisoqarnissaanik. Taamaattumik neqeroorusiunnginnerni peqqissaartumik misissueqqissaartariaqarputit.

Sulineq ilimaginngisamik paasinarsippat ajornakusoornerusoq aammalu isumaqatigiissutigineraniit annertunerulluni unikaallattariaqassaatit aammalu pisiniartorlu taanna pisoq nutaaq eqqartorlugu. Ilaatigut immaqa ajornarsimappat pisut siumoortumik takunissaat naleqqutinngissinnaavoq neqeroorummut illit aalajangiuteqqanissat.

Akiliinermik tigusisinnaavutit neqeroorusiorniarlutit siumoortumik isumaqatigiissutaareersimappat.

Missingersuineq pisarnertut tunniunneqartarpoq peqqissaartumik misissueqqissaarnani. Kisiannili naatsorsuutigineqassaaq illit suliamik paasisimasalittut akia ajorpallaanngitsumik eqqorsinnaagit.

Aqqutaani takusinnaagukku missingersuineq atorsinnaanngitsoq pisiniartoq kalerrittariaqarpat aammalu isumaqatigalugu tassanngaanniit qanoq pisoqassanersoq.

Suliaq naammassiinnarukku aammalu kingusinnerusukkut annertunerujummik akimik piumasaqarlutit taamaasilluni akimut tamakkiisumik piumasaqarsinnaanngilatit.

Akimik isumaqatigiittoqarsimanngippat

Akimik isumaqatigiittoqarsimanngippat illit piumartuut pisiniartoq aallaavittut akiliisariaqarpoq. Kisiannili piumasaqaataassaaq taanna piumasarineqartoq akia naleqqutinngitsuunissaa suliamut naammassineqartumut sanilliullugu.

Aaqqissuussinerit assigisaallu

Takusinnaagukku neqerooruteqarniarlutit nioqqutissap nalingata akia qaangerpagu pisiniartoq tamanna pillugu paasitissavat aallartinnginnerni.

Aammattaaq nioqqutissaq aaqqissuutissanngilat aaqqissuussineru akiata nioqqutissap nalinga qaangerpagu, pisiniartup kissaatiginngippagu aaqqissuussineq naammassineqassasoq.

Nioqqutissaq misissornissaa siunertaralugu paarigukku neqeroorusiorniarlutit suliaq aallartissinnaanngilat pisiniartoq akuersiteqqaartinnagu. Suliariinnarukku akileeqqusinissamut pisinnaatitaaffiit annaasinnaavat suliamut tamaat imaluunniit suliap ilaanut. Assersuutigalugu isumaqatigiissutigineqarsinnaavoq pisiniartup kingoraartissat akilissagai, kisiannili sulinermi akissarsinerunngitsoq.

Kingusinnerusukkut nangaasoqalerpat suna isumaqatigiissutaasimanersoq pisiniartup uppernarsassavaa taamaallaat neqeroorummik piumasaqartoqarsimasoq. Tamatigulli tunniussisariaqarputit tunniussinermi allagartaq, tassanilu ersarissumik takuneqarsinnaalluni kisimi neqeroorusiornermik piumasaqartoqarsimasoq.

Isumaqatigiissummi allannguutit

Sulineq aqqutaani allannguuteqarpat pisiniartorlu aallaqqaammut isumaqatigiissutigisassinniit allaanerusumik ersarissumik pisiniartumut nalunaarutigissavat qanoq akianut sunniuteqarnersoq aammalu piffissaanut. Tamanna atuuppoq siunnersuut pisiniartuminngaanneeraluarpat imaluunniit ilinniit.

Inernera allaasinnaavoq soorlu assersuutigalugu alla atortussaq imaluunniit ikiuineq ilaanngitsoq aallaqqaataani akianut.

Sioqquttumik aalajangersimasumik isumaqatigiissuteqarsimanngippat aqqutaani pisiniartumut nalunaarutigisariaqarpat akia taakkununnga ikiuutinut piumasarisaanut imaluunniit illit siunnersuutigisarnut. Assersuutigalugu tamanna pisinnaavoq nujalerisuuguit, amerissaasuuguit allaluunniit ikiuinerup annertussusaa tamatigut sioqqutsisumik ersarissumillu isumaqatigiissutigineqartuaannanngittoq.

Pingaaruteqarpoq illit suliamik paasisimasalittut piareersimaffiginissaa pisiniartup tamatigut eqqumaffigiuaannanngikkaa akitigut assigiinngissuseqartoq, aammalu taamaattumik immaqa akia apeqqutiginagu.

Pisarissersuut

Annermik assaminnik sulisartut nalaattarpaat pisiniartumiit piumaffigineqarneq aaqqissuussinissamik annikitsumik suliaqaqqusinermik, naak aggersarneqarnikuullutik allaqqinnaamik suliaqassallutik. Assersuutigalugu qarmaasoq aggersinneqarsimasoq tummeqqat aaqqissuunniarlugit, kisiannili aamma piumaffigineqartoq iikkami putoq aaqqeqqullugu. Suliassp annertussusaa akianut sunniuteqarpat ersarissumik pisiniartumut paasitissavat.

Aammattaaq atuuppoq illit nammineq siunnersuutigigukku suliaqarnerunissaq. Assersuutigalugu taanna nioqqutissaq aaqqissuunniarlugu paarisat kukkunermut aalajangersimasumut salinneqarnissaminut amigaateqartoq. Pisiniartoq aperigukku nioqqutissaq salinneqassanersoq isumaqarsinnaavoq sullissinerusoq akimik paasititsinngikkuit.

Scroll to Top