Pisiniarfimmi pisinermi utertitsisinnaatitaaneq

Pisiniarfimmi tunisinermi nammineq toqqangassaavoq illit utertitsisinnaanermik neqerooruteqassanersutit, aammalu annertunerusumk nammineq aalajangersinnaasut suut inatsisit tassunga atuutissanersut.

Utertitsisinnaatitaaneq

Utertitsisinnaatitaanermik neqerooruteqaruit pisiniartup aningaasaatini tigoqqissavai. Pisiniartup aningaasat amerlassusai tigoqqissavai aallaqqaataanilli nioqqutissamut akiliutigisimasani, naak nioqqutissaq akikillisimangaluarpalluunniit.

Taarsiisinnaatitaaneq

Taarsiisinnaatitaanermik neqerooruteqaruit pisiniartup pisiniarfimmi pisiassat allat toqqarsinnaavai. Pisiniartoq allanik nioqqutissanik pisisinnaatitaassaaq aningaasat annertoqqataanik allaqqaataaniilli nioqqutissamut akiliutigineqarsimasut assiganik. Periarfissaqarputittaaq pisiniartumut pisissutissatut uppernarsaammik neqerooruteqassallutik.

Utertitsisinnaatitaanerup atorluarnissaanut malittarisassat

Utertitsisinnaatitaanerup atornissaa pillugu immikkuullarissunik malittarisassalioruit pisiniartoq ersarissumik tamanna pillugu pisinnginnermini paasitinneqassaaq. Assersuutigalugu:

  • Pisiaq ammarneqarsimassanngilaq
  • Meqqit assigisaallu nioqqutissamiit peerneqarsimassanngillat
  • Paarnaarutit ammarneqarsimassanngillat
  • Nioqqutissaq utertinneqarsimassaaq aalajangersimasumi piffissaliussami

Piumasaqaataavoq nioqqutissaq utertinneqarnermini suli nutaatut atorneqarsimanngittullu isikkoqassasoq, taamaasillunimi tuniniaqqinneqarsinnaaniassammat.

Utertitsisinnaatitaanermut uppernarsaaneq

Pisiniartup uppernarsassavaa nioqqutissaq illit pisiniarfiuterni qaqagukkut pisiarineqarsimanersoq, aammalu qanoq akeqarsimanersoq. Pisiniartup aammattaaq uppernarsassavaa illit utertitsisinnaatitaanermik neriorsuisimasutit. Kisianni illit uppernarsassavat immikkuullarissunik utertitsisinnaatitaanermut malittarisassaliorsimaguit, aammalu pisiniartoq taakkununnga malittarisassanut paasitinneqarsimassasoq.

Siunnersuut pitsaasoq

Pisiniartornut utertitsisinnaatitaanermik neqerooruteqaruit atugassat erseqqarissumik oqaasertalikkit, taamaasillutimmi ajornartorsiutit pinngitsoortissinnaavatit. Pingaartumik sukannersumik piumasaqaateqaruit amerlanerpaat pisiniartut naatsorsuutigisinnaasaanniit.

Utertitsisinnaatitaanermut paasititsineq

Utertitsisinnaatitaaneq pillugu paasissutissiisinnaavutit pisiniarfimmi allagartaliinikkut imaluunniit pisinermut uppernarsaammi. Naliginnaasumik utertitsisinnaatitaanermik neqerooruteqaruit, kisiannili nioqqutissanut tamanut atuutinngittumik aammattaaq tamanna assiganik paasissutissiissutigissavat. Soorlu assersuutigalugu utertitsisinnaatitaaneq akikilliliilluni tuniniakkanut imaluunniit aappassaanik tuniniaqqitanut atornikunut atuutinngippat aammattaaq tamanna allagartani imaluunniit pisinermut uppernarsaatini takuneqarsinnaassaaq.

Utertitsisinnaatitaanerup atorunnaarnera

Utertitsisinnaatitaaneq nioqqutissanut tamanut atuutinngippat pisiniartup kissaateqarnera malillugu allanngortinneqarsimasunut imaluunniit aaqqinneqarsimasunut immikkut pingaaruteqarpoq pisiniartoq tamanna pillugu pisinnginnerani ilisimatinnissaa. 

Pisiniartoq nioqqutissamik allatsitamik tiguserusunngippat

Illit pisiniartullu atassuteqatigiilertarpusi pisinermut tunngatillugu isumaqatigiissuteqarussi. Nioqqutissamik allatsitsineq soorlu illit tikisissallugu allatsitassat pisinermut tunngatillugu isumaqatigiissutaavoq. Aalajangiisuunngilaq qaqagukkut akiliineq pinersoq imaluunniit qaqagukkut pisiniartup nioqqutissaq tiguneraa. Pisariaqanngilaq ataatsikkut pinissaa isumaqatigiissuteqarnermi.

Utertitsisinnaatitaanermik neqeroorfigitissimanngikkuit pisiniartoq taamaalilluni pituttorsimalertarpoq allatsitsinermi. Pisiniartup nioqqutissaq allatsissimappagu aammalu kingusinnerusukkut aajumanagu akileerusunnagulu tamanna tunngatillugu annaasaqaatigisimasarnut akiliisoqarnissaa piumasarisinnaavat. Soorlu assersuutigalugu nioqqutissaq tunissagukku akia appartittariaqarsinnaavat imaluunniit utertinneranut aningaasartuuteqarlutit. Aalajangeereersinnaanngilatit aningaasat amerlassusaannik illit pissarnik pisiniartup tunngaveqarani niuerneq atorunnaarsippagu, aningaasat amerlassusiata eqqorluartumik annaasaqarneq matussusinngippagu.

Isumassarsiatsialaasinnaavoq qularnaveeqqusiissummik tulluartumik akileeqqusinissaq, taakkualu aningaasartuutinut matussusiinissamut atorneqarsinnaapput pisiniartup nioqqutissamik allatsitsineraniilli.

Malittarisassat allat internettikkut niuerneeq pillugu

Nittartakkatigut imaluunniit allatsitsinikkut nioqqutissanik tuniniaaguit eqqumaffigissavat taamannak tuniniaasoqartillugu utertitsinissamut malittarisassat allat atuummata. Uani pisiniartoq naliginnaasumik ullut 14-it utertitsisinnaatitaavoq tunniussinerup ulluaniit atuuttumik.

Scroll to Top