Nioqqutissap akia

Atuisartunut niuertaruit tamatigut akia paasitittuaannassavat akileraarutit tamaasa ilanngullugit. Pisiniartut ersarissumik nioqqutissat tamarmik akii takusinnaassavaat.

Pisiniartut pisiniarfimmut iserunik ersarissumik takusinnaassavaat nioqqutissat tamarmik tuniniarneqartut pisiniarfimmi qanoq akeqarnersut. Akia allaqqasinnaavoq akiinik meqqilersuinikkut nioqqutissami, ilisiviit saanni imaluunniit allagartami nivingasumi. Nalorninartoqassanngilaq sorlermut nioqqutissamut akia atuunnersoq.

Pisiniarfiit ataasikkaat akinik nalunaarsuuteqarneq ajorput, kisiannili akit allattorsimaffiannik nivinngaasinnaallutik imaluunniit skannerinik nappartiterisimallutik, taamaasillutillu pisiniartut namminneq akia pisiniarfimmi paasisinnaassallugu. Inerteqqutaanngilaq pisiniartumut ajornanngippat sukkallunilu taamaasiornikkut akiata paasinissaa.

Pisiniartut aammattaaq nioqqutissat akii takusinnaassavaat saqqummersitsivimmiittut.

Pisiniarfimmi akit kukkusut

Pisiniartup piumasarisinnaavaa akigititatut nalunaarsimasoq kukkunerugaluarpalluunniit akiinik meqqilersornerani akigitinneqartutut allagarsiussaq naapertorlugu akiliinissaq. Immikkulli ataasiakkaanik pisoqarsinnaavoq. Soorlu assersuutigalugu nioqqutissaasinnaavoq allap pisiniartup nuussimasaa aammalu nerrivimmut akikilliliilluni tuniniakkanut ilisimallugu.

Pisiniartup aammattaaq piumasarisinnaanngilaa kukkusumut akigititamut pisiariumassallugu ersarippat kukkuneq eqqartorneqartoq. Soorlu assersuutaasinnaavoq akianut allagartaq nioqqutissamiit akikittumiit nioqqutissamut akisunerujummut nakkarsimappat.

Internetsikkut niuernermi akit

Pisiniartup nioqqutissap akia paasisussaatitaavaa. Aammattaaq illit paasititsissutigissavat tunniussinermi aningaasartuutaasinnaasut, aammalu suulluunniit akitsuutit, akileraarutit assigisaallu.

Nittartagaq naliginnaasumik atuisunut saaffiginnippat taanna paasitinneqartoq akia tamatigut ilannguttassavai akileraarutit tamarmik.

Internetsikkut akit kukkusut

Internetsikkut pisiniarfiusinnaasumik peqaruit taakkua akigititat naliginnaasumik atuuttuussapput. Tamanna isumaqarpoq pisiniartup pisinnaaffigivaa nioqqutissaq pisiarissallugu akigitinneqartumut, aammattaaq kukkungaluarpalluunniit.

Immikkulli ataasiakkaanik pisoqarsinnaavoq. Pisiniartup piumasarisinnaanngilaa nioqqutissaq kukkusumut akikinnerusumut pisiarinissaa ersarippat kukkunerusoq.

Neqeroorusiornissamut kajumissaaneq

Isumannaarusukkukku nioqqutissaq kukkusuunngittoq akigititavianut tunilerit nittartakkat ilusilersorsinnaavat taava isumaqatigiissusiortoqartinnagu pisiniartup nioqqutissaq koorimut ilippagu. Taamaaliorsinnaavutit oqaasertaliinikkut, taamaasillunilu pisiniartup ersarissumik takutissavaa isumaqatigiissut atuutilinngittoq illit uppernarsaqqaartinnagu.

Naammanngilaq taamaattoq nangaassuteqarneq niuernermut piumasaqaatini naliginnaasuni toqqoqqanissaa, imaluunniit aatsaat pisereernermi pisiniummut uppernarsaammi.

Ussassaarutini akit kukkusut

Kukkullutik akimik kukkusumik ussassaarutini paasititsiguit imaluunniit ussassaarutini aviisini taanna kukkusoq akigititaq ilinnut atuutissanngilaq. Piumasaqaataassaarli illit kukkuneq aaqqissagit pisiniartup nioqqutissaq pisiarinnginnerani.

Kukkullutit nittartakkarni akimik kukkusumik paasititsiguit, aammalu nittartagaq taamaallaat katalogitut imaluunniit ussassaarinertut atuuppat, aammalu nioqqutissaq allatut pisiarineqassalluni, qulaani malittarisassat eqqartorneqartut atuupput.

Ussassaarutini akinik kukkusunik paasitsineq ussassaarineq pillugu inatsimmi uukapaatitsinermut inerteqqummut akerliliineruvoq, aammalu ingasattumk imaluunniit arlaleriarluni unioqqutinneqaruni politiinut nalunaarutiginninnermik kinguneqarsinnaalluni.

Scroll to Top