Pisiniartup nioqqutissaq pisiani aanngilaa

Illit pisussaaffeqarputit pisiniartup nioqqutissaataa paarinissaanut aaneqarnissaata tungaanut.Tuniniaqqusaanngilat imaluunniit kaseeqqusaanngilat, naak arlaleriarlutit pisiniartoq aallequnikuungaluarlugu.

Taamaasillutik nioqqutissaq toqqoqqassavat aaneqarnissaata tungaanut – naak aamma piffissaq sivisooq ingerlareeraluartoq, soorlu assersuutigalugu ukioq ataaseq. Nioqqutissaq akisuneruppat piffissaq sivisooq pisussaaffigissavat toqqoqqanissaa. Aalajangersimasumik malittarisassaqanngilaq qanoq sivisutigisumik illit nioqqutissaq toqqoqqassanerit. Taamaattorli naleqquttumik toqqoqqaneranut akissarsisinnaavutit.

Toqqorsineq akisuallaartumik aningaasartuuteqartitsippat imaluunniit aningaasartuutit toqqorsinermi nioqqutissap nalinga qaangerpagu nioqqutissaq pitsaanerpaamik tuniniarsinnaavat. Nioqqutissaq naleqanngippat arlaanni igissinnaanngussavat. Kisianni taamaasiunnginnerni qularnaaqqaassavat naleqanngitsoq.

Nioqqutissaq tuniniartinnagu imaluunniit iginneqannginnerani misilillugu pisiniartoq kalerreqqaassavat taamaattoqarniartoq.

Pisiniartumut aallernissamik nukingisaarineq

Pisiniartup piffissaq sivisooq ingerlareersoq nioqqutissaatini aasimanngippagu taava mailikkut imaluunniit allakkatigut pisiniartumut allassaatit, tassanilu naleqquttumik piffissaliussamik tunissavat nioqqutissap aanissaanut. Allakkatigut nassiussiguit taava TELE-POST-imiit uppernarsaammik piumassaatit. Taamaasillutit kingusinnerusukkut uppernarsarsinnaassavat pisiniartoq attaveqarfigisimallugu.

Suli nioqqutissaq aarusunngippagu piffissap naleqquttup kingorna tuniniaratarsinnaassavat. Pisiniartoq tunisinermi iluanaarteqarsinnaassaaq akiliutigineqartussamik.

Nioqqutissat aaneqanngitsut pillugit iginneqarnissaanut piumasaqaatit

Ataasiakkaat inuutissarsiutigalugu ingerlatsisut tunniussinermi immersugassaatiminni imaluunniit pisiniarfimmi allagartatigut paasititsissutigisarpaat nioqqutissat assersuutigalugu qaammatit pingasut iluanni aaneqanngitsut iginneqarumaartut. Taamaattut piumasaqaatit naleqqutinngillat aammalu qaangiinnarneqassallutik.

Naak pisiniartoq paasitissimangaluarit nioqqutissat piffissami sivikitsuinnarmi toqqoqqaneqartartut kasiissanngilatit. Taamaattoq kaseerukkit taarsiinissamik akileeratarsinnaavutit pisiniartumut.

Siunnersuut pitsaasoq

Pisiniartuppit atia telefonillu normua aammalu najungaa mailialu pikkit.

Scroll to Top