Inigisavit qimanneranut atatillugu akiligassat pillugu Inissiaatileqatigiiffiup XX-ip aalajangiineranut tunngasumik maalaaruteqarnerit Ineqarneq pillugu Maalaaruteqartarfiup ulloq 12. aggusti 2021-mi suliarivaa imalu aalajangiivoq Ineqarneq pillugu Maalaaruteqartarfik ima aalajangiivoq:
AALAJANGIINEQ
Ineqarneq pillugu Maalaaruteqarfik isumaqarpoq, najugakuvit XX-XXX-imiittoq nalinginnaasumik iluarsartinnera nammineq akilissagit.
Ineqarneq pillugu Maalaaruteqartarfik sullissineq taarsiiffigineqarnerlu pillugit apeqqummut tungatillugu suliaqarnissaminut piginnaatitaanngilaq.
Kalaallit Nunaata Eqqartuussivianut unnerluussissallutit innersuussutigineqarpoq, qulaani maalaarutigineqartut suliarisinnaanngisagut maalaarutigerusukkukkit.
Tamanna isumaqarpoq, maalaarutinnut ilalerneqanngitsutit.
Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersoq kingusinnerusukkut allannguuteqartoq naapertorlugu aaliangiisoqarpoq.
Suliami allagaatit:
- Ineqarneq pillugu Maalaaruteqarfimmut maalaarutit 9. marsi 2021-meersoq.
- Attartornermut isumaqatigiissut 4. maaji 2018-imeersoq.
- Nakkutilliinermi nalunaarusiaq 18. decembari 2020-meersoq.
- Najukkamit nutsernermi akiligassaq 6. januaari 2021-meersoq.
- Ilinnit assit ulloq 9. marsi 2021-mi nassiunneqarnikut.
- Oqummik misissuineq 28. decembari 2021-meersoq.
- Inissiaatileqatigiiffimmiit maalaarut pillugu oqaaseqaat 7. apriili 2021-meersoq.
Nassuiaat:
Ulloq 9. marsi 2021 Ineqarneq pillugu Maalaaruteqarfimmut inissiaatileqatigiiffik XX aqqutigalugu najugaqarfikut, XX-XXX pillugu maalaaruteqarputit.
Attartornermut isumaqatigiissummi takuneqarsinnaavoq, najugaq ulloq 4. maaji 2018-imi tigusimagit.
Inissiaq 88,10 m²-iuvoq 5-nullu najukkanut agguataaqqalluni.
Ulloq nutserfissaq kingulleq 30. decembari 2021-mut killeqarpoq.
Misissuinermi nalunaarusiaq 18. decembari 2020-meersoq malillugu, najugaq nalinginnaasumik iluarsartuunneqartussaavoq, iikkat qilaarlu qalipanneqarlutik naterlu lakkerneqarluni.
Aammattaaq oqaatigineqarpoq, najugaq pisussaaffimmik sumiginnaaneq peqqutaalluni qalipanneqaqqillunilu eqqiarneqarluni iluarsartuunneqartussaasoq.
Nakkutilliinermi nalunaarusiaq ilinnit atsiorneqarsimavoq.
Inigisavit qimanneranut atatillugu akiligassami 6. januaari 2021-meersumi takuneqarsinnaavoq, 14991 koruuninik nalinginnaasumik iluarsartuutsitsinermut 31,5 %-mik ilanngaaseqqaarnagit, isumaqartoq inigisanni qaammatit amerlassusaat naapertorlugu, akiligassitsissimavutit.
Allaqqavortaarlu pisussaaffimmik sumiginnaanermut 3543 koruunit akilissagitit.
Naggataatigut 12765 koruunit qularnaveeqqummut aamma 2853,70 koruuninik annertuallaamik attartornermut akilersimavatit.
Tassa isumaqarpoq, inissiaatileqatigiiffimmiit katillugit 1806,87 koruuninik ajunngitsorsiassaqarputit.
Ineqarneq pillugu Maalaaruteqartarfimmut maalaarutinni takuneqarsinnaavoq, najugakunni oqoqartoq aamma sullissinerlunnimmik nalaataqarsimasutit. Taamaattumik isumaqarputit, nalinginnaasumik iluarsartuussineq akilertussaanagu, aamma qalipaanermut akiliutit qularnaveeqqullu ilinnut utertinneqassasut.
Najugaq XXZ-imiit misissorneqarsimasoq oqaatigaat, misissuinerli oqoqarneranik uppernarsaanngitsoq, inissiaatileqatigiiffiup misissuisoqannginnerani ajoqutit iluarsartuutereermagit. Taamaattumik oqoqarneranut misissuinermut sunniuteqarsimasoq isumaqarputit.
Naggataatigut oqaatigaat, XXZ-ip misissuisimaneranut atatillugu 2450 koruuninik taarsiiffigineqarusupputit, akkanniit ikiorneqarninnut 1000 koruuninik taarsiiffigitikkusupputit, najukkanni nerisassaarussimanerit peqqutaalluni aamma angajoqqaanniit ikiorneqarnerit peqqutaalluni 1000 koruuninik taarsiiffigineqarusupputit.
Maalaarutinnut ilanngullugit najukkap assingi nassiuppatit.
Aammattaaq XXZ-ip ulloq 28. decembari 2020-mi oqoqarneranik misissuinera nassiuppat, tassanilu takuneqarsinnaavoq, silaannarissarfik oqoqartoq, silaannarissarfiilli avataani oqummik takussutissaqanngitsoq.
Inissiaatileqatigiiffiup ulloq 7. apriili 2021-mi Ineqarneq pillugu Maalaaruteqartarfimmut oqaatigaa, isaariami ruujoreqarfinni kisimi oqummik nassaarsimallutik, taannalu nassaarfiat matoqqasuusoq, taamaattumillu najukkami oqummik siaruaattoqarsimanngitsoq.
Aammattaaq inissiaatileqatigiiffiup oqaatigaa, illup iluata silaannaa ajoquteqanngitsoq silaannaritsorlu. Taamaattumik inissiaatileqatigiiffiup najugaq oqoqartoq imaluunniit peqqinnissamut ulorianaateqartoq isumaqanngilaq.
Inatsisitigut tunngavigisaq:
Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersumi § 45 imm. 3. allassimavoq piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigigaa taakkununngalu aningaasartuutit akilissallugit.
Peqqussummi tassani § 77, imm. 1-imi allaqqavoq, inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iigaanik qalipaaneq aamma/imaluunniit ungalitsersuineq kiisalu eqqiaaneq. Naqqit nutaamik lakkersimasutut isikkoqassapput, taamaattorli tak. imm. 3.
- 78 malillugu attartortitsisup § 77 malillugu nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai. Piffissaliussatut aalajangiunneqartup naannginnerani inissiamit anisoqarnerani attartortup taamaallaat aningaasat piffissami tassani attartortitsinerup atorunnaarfigisaani attartortitsisumit akilerneqartussanngorsimanngitsut akilissavai.
Aammattaaq peqqussummi tassani § 84, imm. 1-imi allassimavoq Ineqarneq pillugu maalaaruteqartarfiup attartortut maalaarutaat makkununnga tunngasut suliarisarpai:
1) Ineqarnermut akiliutinik qaffaanissamik siumoortumik ilisimatitsisarnermi piumasarisat, § 28, imm. 2 takuuk.
2) Aserfallatsaaliuineq iluarsaassinerlu, § 45 takuuk.
3) Inissiap iserterfigineqarnerani qanoq issusia, § 47 takuuk.
4) Attartukkami atortut ikkussukkat pitsanngorsaanerillu (atuisinnaatitaaneq), §§ 51 aamma 55 takukkit.
5) Attartortup atukkaminik atuinera (torersaanissamik malittarisassanik unioqqutitsinerit), § 50 takuuk.
6) Atuisinnaatitaanerup allanut tunniunneqarnera (inissianik paarlaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq) §-it 58-62 takukkit.
7) Inissiamit aninermi inissiap qanoq issusia (iluarsaassineq nalinginnaasoq) § 77 takuuk.
Aalajangersagaq tamakkiisuuvoq.
Naliliineq:
Ineqarneq pillugu Maalaaruteqartarfik isumaqarpoq, inissiap XX-XXX-imiittoq nalinginnaasumik iluarsartinnera eqqiarneralu nammineq akilissagit.
Peqqussummi tassani § 77, imm. 1-imi allaqqavoq, inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iigaanik qalipaaneq aamma/imaluunniit ungalitsersuineq kiisalu eqqiaaneq. Taassuma saniatigut naqqit tamarmik lakkeqqammersutut isikkoqartussaapput.
Aammattaaq Ineqarnermut Maalaaruteqartarfiup tunngaviliussimavaa, nakkutilliinermi nalunaarusiaq oqaaseqaateqarnak atsiorsimagakku.
Aammattaaq Ineqarneq pillugu Maalaaruteqartarfiup tunngaviliuppaa, inissiaatileqatigiiffiup oqaatigisimagaa, najukkami misissuinerup ruujorimi oqoqartoq nassaarsimammata, taannalu matoqqasuusoq. Tamanna XXZ-imit oqoqarneranik misissuinerup uppernarsarpaa, tassanilu ruujoreqarfiup ungataata oqoqannginnera takutillugu.
Naggataatigut Ineqarneq pillugu Maalaaruteqartarfiup najukkami assilisavit nassiussimaneri pingaartippaa. Taamaattumik Ineqarneq pillugu Maalaaruteqartarfiup nassiunneqartut tunngavigalugit oquk qanoq annertutigisoq pineqarnersoq nalilersorsinnaasimanngilaa.
Taamaattumik Ineqarneq pillugu Maalaaruteqartarfik isumaqarpoq, nalinginnaasumik iluarsartuussinermut piumasaqaatit annikillisinnissaanut tunngavissaqanngilaq, najugaq annertuumik amingaateqanngimmat.
Aalajangiineq:
Ineqarneq pillugu Maalaaruteqartarfik isumaqarpoq, inissiap XX-XXX-imiittoq nalinginnaasumik iluarsartinnera eqqiarneralu nammineq akilissagit.
Ineqarneq pillugu Maalaaruteqartarfiup inissiaatileqatigiiffiup aalajangiinera atuutsiinnartippa. Tamanna isumaqarpoq, ilalerneqanngitsutit.
Ineqarneq pillugu Maalaaruteqartarfiup aalajangiineri Namminersornerullutik Oqartussanut (Namminersorlutik Oqartussanut) kommuninullu inissianik attartortitsisuusunut pituttuisumik sunniuteqarput, § 86, imm. 6 naapertorlugu.
Naammagittaalliuuteqarnissamut ilitsersuut:
Ineqarneq pillugu Maalaaruteqartarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq, Inissianik attartortitsisarneq pillugu Inatsisartut peqqussutaanni nr. 2-mi, 12. maaji 2005-imeersumi kingusinnerusukkullu allanngortinneqartumi, § 86, imm. 7 naapertorlugu.
Ineqarneq pillugu Maalaaruteqartarfiup aalajangiinera eqqartuussisunut suliassanngortinneqarnissaa kissaatigineqarpat, attartortitsisumik sassaqqusissut, tassa Namminersorlutik Oqartussat imaluunniit kommuni Kalaallit Nunaata Eqqartuussivianut tunniunneqassapput.
Inussiarnersumik inuulluaqqusillunga
Naja Joelsen
Ineqarneq pillugu Maalaaruteqartarfimmi siulittaasoq
Assilinera Inissiaatileqatigiiffimmut nassiunneqarpoq. Attartorluni normu innersuutigineqarpoq: XX-XXX-XXXX