Naligiimmik Pinninnissaq Pillugu Aalajangiisartunut maalaarsinnaavutit, assigiinngisitsinermut tunngaviit uku tunngavigalugit assigiinngisitaasimaguit:
•
Suiaassuseq
•
Naartuneq
•
Meeravissiartaarneq
•
Erninermi sulinngiffeqarneq
•
Kinguaassiutitigut sammivik
•
Suiaassutsini kinaassuseqarneq
•
Suiaassutsimik takutitsineq
•
Suiaassutsit ilisarnaataa
•
Kingoqqiffik
•
Ammip qalipaataa
•
Inuiaqatigiinni pinngorfik
•
Inooqatigiinnermi pinngorfik
•
Inuianni pinngorfik
•
Innarluuteqarneq
•
Ukioqqortussuseq
•
Politikkikkut isiginnittaaseq
•
Upperisaq
•
Upperisaqarneq
Toqaannartumik toqqaannanngitsumillu assigiinngisitsinerit kiisalu nakkarsaanerit inerteqqummi ilaapput.
Toqqaannartumik assigiinngisitsineq tassaavoq, inuup allap assigisaanik inissisimasup pineqarsimaneranut, pineqarneranut imaluunniit pineqartussaagaluarneranut sanilliullugu ajornerusumik pineqarpat qulaani taaneqartut arlaat pissutaasuulluni.
Toqqaannanngitsumik assigiinngisitsineq tassaavoq, aalajangersakkap, piumasarisap imaluunniit suleriaatsip, arlaannaannulluunniit atarpasinngitsup, qulaani assigiinngisitsinermut tunngaviit taaneqartut pissutigalugit arlaatigut inississappatigit. Taamaattoq aalajangersagaq, tunngavigisaq imaluunniit suleriaaseq pineqartoq inatsisinut naapertuuttumik kinaassusersiunngitsumik tunngavilersuutitaqarpat aammalu siunertap taassuma naammassinissaanut aningaasassat naapertuuppata pisariaqarpatalu, taanna atuutissanngilaq.

Nakkarsaaneq tassaavoq, inuup naleqassusaata innarlernissaa aammalu qunusaarisumik, akeqqersimaartumik nakkarsaasumik, nikanarsaasumik imaluunniit nuanninngitsumik akaareqatigiinnginnissaq siunertaralugu imaluunniit taamatut sunniutilimmik, assigiinngisitsinermut tunngaviusunut atatillugu kissaatigineqanngitsumik pissusilersortoqarpat.

Assigiinngisitsineq misigisimagukku Naligiimmik Pinninnissaq Pillugu Aalajangiisartunut imaaliorlutit maalaarsinnaavutit:
•
naammagittaalliuummik immersuiffissaq immersorlugu
•
allakkamik allallutit
•
e-mail-imik allallutit
•
sianerlutit
•
takkullutit saaffiginnillutit
Paasissutissat
Paasissutissat uku pisariaqartippagut:
•
paasissutissat ilinnut tunngasut (ateq, najugaq, inuup normua)
•
attavigineqarnissannut paasissutissat
•
kina maarutiginerit (maalaarutigineqartoq)
•
maalaarutigineqartup attavigineqarnissaanut paasissutissat
•
assigiinngisitaarfigineqarnernut nassuiaassut
•
suna tunngavigalugu assigiinngisitaarfigineqarsimanerit
•
maalaaruteqareernermi suna angorusunnerit
Soraarsitaasimaguit uku ilanngullugit nassiussissaatit:
•
atorfininnermut isumaqatigiissut
•
soraarsitaanermut allagaqaat
•
akissarsiat allagartaat
•
sapaatit-akunnerini kingullerni 6-ini akissarsiavit allagartai
Innarluuteqarnerit tunngavigalugu assiginngisitaasimaguit uku ilanngullugit nassiussissaatit:
•
Paasissutissat innarluuteqarninnut piginnaasakinnernullu allaaserinnittut. Tassaasinnaapput nakorsamiit imaluunniit kommunimiit paasissutissat.
Uppernarsaatit
Allassimasuutit assigiinngitsut akkiullugit nassiussinnaavatit uppernarsaatitullu atorlugit. Allassimasuutit tassaasinnaapput skærmip assilineqarnera, sms-it imaluunniit allassimasuutit allat. Assit, nipimik videomillu immiussat aamma nassiunneqarsinnaapput.
Piginnaatitsineq
Suliami inatsisilerituujunngitsumik illua-tungiuliullugu sinniisoqaruit, piginnaatitsissumik nassinneqarnissarput piumasaqaatigissavarput.
Naligiimmik Pinninnissaq Pillugu Aalajangiisartut aalajangigai inaarutaasumik aalajangiinerusarput, taamaattumillu allaffissornikkut ingerlatsisunut allanut ingerlateqqinneqarsinnaanatik, kisianni eqqartuussiveqarfinnut tunniunneqarsinnaalluni.

Naligiimmik Pinninnissaq Pillugu Aalajangiisartut siulittaasumik ataatsimik ilaasortanillu allanik sisamanik ilaasortaqarpoq.
Siulittaasoq inatsisilerituutut soraarummeersimassaaq. Naalakkersuisut siulittaasoq ilaasortaatitallu sisamat ukiuni pingasuni atuuttussanngorlugit toqqassavaat. Ilaasortat sammineqartuni ataatsimi arlalinniluunniit suliatigut uppernarsarneqartunik ilisimasaqassapput, aalajangiisartut taamaalillutik taamaattoqarsinnaatillugu tunngavinnik § 4-mi taaneqartunik tamanik ataatsimut ilisimasaqassapput.
Naligiimmik Pinninnissaq Pillugu Aalajangiisartut ukuninnga ilaasortaqarpoq:
Kirsten Thomassen, siulittaasoq (Naalakkersuisuniit toqqarneqartoq)
Qillaq Ilannguaq Olsen, MIO-miit, Sipineq+-imiit Inuit Pisinnaatitaaffii Pillugit Siunnersuisoqatigiinniilu inassutigineqartoq
Ditte Enemark Sølbeck, MIO-miit inassutigineqartoq
Lise Mørup Dalsgaard, Inuit Pisinnaatitaaffii Pillugit Siunnersuisoqatigiinniit inassutigineqartoq
Poul Erik Munk Pedersen, Ilisimatusarfimmiit inassutigineqartoq
Ilaasortat ulloq juulip 1. 2024-imiit ulloq juunip 30. 2024-ip tungaanut atuuffeqartussanngorlugit toqqarneqarnikuupput.

Naligiissitaaneq assigiinngisitsinnginnissarlu pillugit Inatsisartut inatsisaat

Naligiimmik Pinninnissaq Pillugu Aalajangiisartut suliassaminnut naapertuuttumik suleriaasissartik namminneerlutik aalajangersassavaat. Tak. Naligiissitaaneq assigiinngisitsinnginnissarlu pillugit Inatsisartut inatsisaanni § 26.
Suleriusissaq suli aalajangerneqanngilaq.

Ukiut tamaasa kingusinnerpaamik 1. maaji aalajangiisartut ukiup siuliani suliaqarsimanertik pillugu nalunaarummik tunniussissapput, tak. Naligiissitaaneq assigiinngisitsinnginnissarlu pillugit Inatsisartut inatsisaanni § 33.

Naligiimmik Pinninnissaq Pillugu Aalajangiisartut ukiumut nalunaarutaat 2025