Ineqarneq pillugu Maalaaruteqartarfiup 2014-imut ukiumoortumik nalunaarusiaa

Siulequt

Ineqarneq pillugu maalaaruteqartarfiup ukiumoortumik nalunaarut saqqummiuppaa Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq § 83, imm. 4 naapertorlugu.

Nalunaarutip ukioq naallugu nalunaarsuut najoqqutarivaa imaqarlunilu naatsumik nassuiaammik Ineqarneq pillugu maalaaruteqartarfiup suliassarisaanik, naatsorsuutinik maalaarutit pillugit suliarineqarsimasunik aammalu sulianik naammassineqarsimasunik.

Nalunaarut aamma nassaassaavoq Ineqarneq pillugu maalaaruteqartarfiup quppersagaani: www.maalaarut.gl / www.aua.gl

Ineqarneq pillugu maalaaruteqartarfiup allatseqarfia isumaqatiginninnikkut tunniussisinnaavoq imaluunniit nassiussilluni ukiumoortumik nalunaarutip assinganik pappialanngorlugu.

Ineqarneq pillugu maalaaruteqartarfiup allatseqarfia attavigineqarsinnaavoq uunga:

Najugaqarfik: Imaneq 29, 1, postboks 689, 3900 Nuuk
Mail: maalaarut@nanoq.gl
Oqarasuaat: 32 80 33
Fax nr.: 32 78 50

Nuuk, juli 2015

Naja Joelsen
Ineqarneq pillugu Maalaaruteqartarfiup
Siulittaasua

Paasissutissat naliginnaasut

Ineqarneq pillugu maalaaruteqartarfik pilersinneqarsimavoq Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq § 82, imm. 1 tunuliaqutaralugu.

Ineqarneq pillugu maalaaruteqartarfik nunatsinni allaffissornikkut qullersaavoq maalaaruteqartarfittut inissianut attartortittakkanut tunngassuteqartunut.

Allaffissornikkut assingusuuvoq eqqartuussiveqarnerup suleriaasaanut, attuumassuteqarani aqunneqaranilu iliuusissatsigut oqaaseqaateqarnissakkulluunniit pisortaqarfinniit imaluuniit allatigut, qanoq suliassat ataasiakkat ingerlanneqassanersut aalajangiiffigineqassanersullu.

Aalajangiisartoqatigiit aalajangiisarput attartortut attartortitsisullu akunnerminni aaqqiagiinngissutaannut Namminersorlutik kommunillu attartortittakkatut ineqarfiutaannut tunngassuteqartunut Illuut A/S inissiaatai minillugit (tamanna pillugu kingusinnerusukkut atuaruk)

Aalajangiinerit atuuttussaatinneqartarput allanngortinneqarsinnaanatik inaarutaasumillu aalajangiinerusarlutik. Ineqarneq pillugu maalaaruteqartarfiup aalajangiussai taamaasillutik allaffissornikkut qullersaqarfinnut allanut ingerlateqqinneqarsinnaanngillat. Aalajangiussat taamaallaat ingerlatinneqarsinnaapput eqqartuussiveqarfinnut maleruagassat naliginnaasut naapertorlugit.

Ineqarneq pillugu maalaaruteqartarfiup siunertaa aamma unaavoq aalajangiussai ersarissumik pingaarutilimmillu sunniuteqartinneqassasut siunnersuinikkut- aammalu suleriaaseq tunngavigalugu innuttaasunut, inissiaatileqatigiiffinnut allanullu taamatut sammisalinnut soqutiginnittunut.

Tamannalu tunngavigalugu Ineqarneq pillugu maalaaruteqartarfik qulakkeerinneqataavoq tunngavilersorluakkanik eqqortunillu aalajangiisoqartarneranik, sumiluuniit illoqarfinni inissiat inissisimagaluarpata.

Maalaaruteqartarfiup atuutsinneqarnera erseqqinnerusumik naleqqussarneqarnikuuvoq attartortitsisarneq pillugu (attartornermut peqqussut) peqqussummi § 82-86-ip tungaanut, Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq aamma Ineqarneq pillugu maalaaruteqartarfiup sulinera pillugu Namminersornerullutik Oqartussat nalunaarutaat nr. 27, 26. november 2008-meersoq.

Ineqarneq pillugu Maalaaruteqartarfiup pisinnaatitaaffii

Ineqarneq pillugu maalaaruteqartarfiup pisinnaatitaaffii erserput attartortitsisarneq pillugu peqqussutip § 84, imm. 1-ianni.

Ineqarneq pillugu maalaaruteqartarfiup suliassaq maalaarut suliarisinnaavaa sammisanut makkununnga attuumassuteqarpat:

  1. Ineqarnermut akiliutip qaffanneqarnissaanik kalerriisoqarpat piumasaqaatit nalinginnaasut naammassinissaat.
  2. Aserfallatsaaliinernut iluarsartuussinernullu tunngassuteqartunut.
  3. Inigisap iserterfigineqarnerani isikkuanut tunngasut.
  4. Attartukkami ikkussugassanut pitsanngorsagassanullu tunngasut (aalajangiisinnaatitaaneq).
  5. Attartortup attartukkaminik atuinera (ineqarfiup maleruaqqusaanik unioqqutitsinerit).
  6. Attartuisinnaatitaanerup allamut tunniunnera (inigisanik paarlaanneq, attartukkamik attartuisitsineq attartornerullu nanginneqarnera).
  7. Inigisap qimannerani isikkuanut tunngasut (nalinginnaasumik iluarsartuineq)

Nalinginnaasumik suleriaaseq imaappoq, Ineqarneq pillugu maalaaruteqartarfiup maalaarutit amerlanersaat suliarisinnaagai inissiaatileqatigiiffinninngaanniit aalajangiussaasimasut.

Ineqarneq pillugu Maalaaruteqartarfimmut maalaaruteqarnissaq 150 kr.-imik akeqartinneqarpoq. Maalaaruteqartoq taamaallaat akiliuteqassaaq, suliap ingerlateqqinneqarnissaa suliarineqalerpat. Akiliut uterteqqinneqassaaq, paasinarsippat, attartortoq tamakkiisumik ilaannakortumilluuniit maalaarumminut taperserneqarsimappat.

Ineqarnermi Maalaaruteqartarfiup naammagittaalliuutit amerlasuut itigartitsissutigisariaqartarsimavaat, pissutigalugu naammagittaalliuutit qulaani taaneqartut naleqqiullugit Ineqarnermi Maalaaruteqartarfiup sullissinissaminut pisinnaatitaqarfianut ilaanngimmata.

Ineqarneq pillugu maalaaruteqartarfiup aaqqissuuneqarnera
(ilaasortaqarnikkut):

Ineqarneq pillugu Maalaaruteqartarfik aaqqissuussaavoq siulittaasoqarluni nalinginnaasunillu pingasunik siunnersuinermut ilaasortaqarluni.

Siulittaasoq taassumalu tullersortaa toqqarneqartarput Naalakkersuisumiit siunnersuusiorfigineqarnikkut Naalakkersuisunut ilaasortaaniit, ineqarnernut tunngasuusunut akisussaassuseqarfeqartuusumiit. Toqqarneqartut tamarmik immikkut inissiaatileqatigiiffinnut tunngassuteqartunut ilisimasaqartuussapput imaluuniit inatsisilerituutut naamassisaqarsimassalluni kandidatitut soraarummeersimanermut uppernarsaateqassalluni.

Maalaaruteqartarfiup ilaasortaa ataaseq taassumalu sinniisussaa toqqarneqassaaq Naalakkersuisuniit siunnersuusiorfigineqarnikkut Inissiaatileqatigiiffik A/S INI-miit.

Maalaaruteqartarfiup ilaasortaa ataaseq taassumalu sinniisussaa toqqarneqassaaq Naalakkersuisuniit siunnersuusiorfigineqarnikkut KANUKOKA-miit maalaaruteqartarfiullu ilaasortaa ataaseq taassumalu sinniisussaa toqqarneqassaaq Naalakkersuisuniit siunnersuusiorfigineqarnikkut Attartortut Nuna tamakkerlugu kattuffianiit IPK imaluunniit SIK, IMAK aamma PPK.

Taakku pingasut nalinginnaasumik ilaasortaasut sinniisuilu inissiaateqarnernut tunngassuteqartunut ilisimasaqartuussapput.

Ineqarneq pillugu Maalaaruteqartarfiup aaqqissuussaanera taamaattumik kinguneqarpoq, attartortut attartortitsisullu soqutigisaqarfianniit sinniisoqartinneqarlutik.

2013-ip naalernerani ilaasortat sinniisullu ilaat tunuarput. Majimilu 2014-mi ilaasortat sinniisullu nutaanik taarserneqarput. Taassuma kingorna aaliangiisartut imatut aaqqissuussaapput:

Siulittaasoq:

Naja Joelsen, inatsisileritooq.
Sinniisussaq: Lise Mørup Dalsgaard

Maalaaruteqartarfimmut ilaasortat:

  1.  Beathe Hendriksen, SIK
    Sinniisoq: Jess G. Berthelsen, SIK
  2.  Bjarne Petersen, KANUKOKA
    Sinniisoq: Pétur Haukur Gudmundsson, KANUKOKA
  3.  Githa Brask Olsen, A/S Boligselskabet INI
    Sinniisoq: Nájanguaq Johansen, ISERIT A/S

Ineqarneq pillugu Maalaaruteqartarfik minnerpaamik ukiumut pingasoriarluni ataatsimiittarpoq.

Ukioq 2014 septemberimi ataasiarlutik naapipput, decemberimilu marloriarlutik.

Suliassat ataasiakkaarlugit siulittaasumiit misissorneqartarput, ataatsimiititaliallu tamarmiusup aalajangiiffigisarlugit. Suliassat aalajangiiffigineqartarput taasinerni amerlanerussuteqarnikkut, tassannga siulittaasoq ilaasortaatitaasullu tamarmik taasinermik ataatsimik naleqartinneqartarlutik. Taasinerni naligiissoqartillugu siulittaasup taasinera aalajangiisuutinneqartarpoq.

Ineqarneq pillugu maalaaruteqartarfiup ukioq 2014-imi sulinera

Siulittaasup nalunaarusiaa:

Siornatigut Ineqarneq pillugu Maalaaruteqarfiup paasititsiniaasarneri 2014-imi kinguneqarluarput, naammagittaalliuutit tiguneqartartut malunnartumik amerlimmata. Taamaattumik Ineqarneq pillugu Maalaaruteqarfik KNR-ikkut assigisaatigulluunniit takoqqusaaruteqanngilaq. Kisianni Ineqarnermut Maalaaruteqarfiup allattoqarfia 2014-mi septemberimi, sineriammi paasissutissiillutik angalapput, Nuummiit kujammut Qaqortup tungaanut illoqarfiit nunaqarfiillu tikinneqarlutik.

Siunnersuisoqatigiinnut Aalajangiisartunullu Aqutsisoqarfiup Ineqarneq pillugu Maalaaruteqartarfiup allaffissornikkut ingerlanera aquppaa. 2014-mi julip aallaqqaataani Aqutsisoqarfik nutaamik ateqalerpoq Atuisartoqarnermut Unammilleqatigiinnermullu Aqutsisoqarfik. Tamannalu Ineqarneq pillugu Maalaaruteqarfiup allaffisornikkut ingerlannerani allaannguuteqanngilaq.

2014-mi Aqutsisoqarfik massakkut najugarisaminut, Imaneq 29, 1. sal, nuuppoq. 2010-imili Aqutsisoqarfik arlaleriarluni nuuttaqattaartarsimavoq. Nutsernerit amerlasuut isumalluutinut ilungersornarsimapput aammalu innuttaasunut sullissinermut sivitsorsaaqataasarsimallutik. Taamaattumik massakkut Aqutsisoqarfik neriuppoq sivisuumik najugarisaminniiginnassallutik, taamatullu nutseqqinngikkallarusullutik.

Naammagittaalliuuteqartarfimmi sulisorineqartunit, 2014-mi ukuusunit inatsisilerituut 3-4½, isumaginninnermi siunnersorti ataaseq, allaffimmiullu ataaseq-marluk, amerlanerit naammagittaalliuutinik ataatsimiititalianut ingerlatitassanut piareersaanermi peqataasimapput. Sullissinermi sulisut amerlasuut peqataatinnerini anguniarneqarpoq, soraaroqartillugu ilisimasat annaannginnissaat.

Soorlu qulaani takuneqarsinnaasoq, Ineqarneq pillugu Maalaartarfiup siulittaasua ilaasortallu/sinniisullu ilai ukioq 2014 ingerlanerani taarserneqarput, ilaat tunuarmata aammalu nutaat Naalakkersuisuninngaanniit toqqarneqarlutik.

Naammagittaalliuutit amerlasuut, ataatsimiitsitaliap allattoqarfianit tiguneqartartut ilaat suliarineqarsinnaaneq ajorput. Tamanna ilaatigut peqquteqarpoq akiliutinik akiliisimannginneq aammalu Ineqarneq pillugu Maalaaruteqartarfik attartortitsisarnerup iluani susassaqarfiit aaliangersimasuinnaat suliaqarfigissallugit piginnaatitaaffeqarmat.

Taamatuttaaq Ineqarneq pillugu Maalaaruteqarfiup naammagittaalliuutit inissianut Illuut A/S-imit pigineqartunut tunngasut suliarisinnaanngilaat. Illuut A/S namminersortutut inissianik attartortitsisartutut suliffeqarfiuvoq, naak tamakkiisumik Namminersorlutik Oqartussanit pigineqaraluarluni. Namminersornerullutik Oqartussat inissiaatiginikuusaat arlallit Illuut A/S-imut nuunneqareerput, tamannalu isumaqarpoq naammagittaalliuutit inissianut taakkununnga tunngasut Ineqarneq pillugu Maalaaruteqarfiup piginnaatitaaffiinut ilaajunnaartut suliarineqarsinnaanatillu. Inissianilu taakkunani attartortut attartortitsisuminnik eqqartuussivimmut suliassanngortitsisariaqassapput aaqqiagiinngittoqartillugu. Ineqarneq pillugu Maalaaruteqartarfiup tamanna attartortut inatsisitigut illersorneqarnerat ajornerulertutut isigaa, tamanna ilaatigut sullissinermik sivitsorsaataassammat, aammalu amerlanertigut eqqartuussisulerisunut aningaasartuuteqarnermik kinguneqartartussaammat. Ineqarneq pillugu Maalaaruteqartarfiup ilisimanngilaa, tamanna inissiat Illuut A/S-imut nuunneqarnerini attartortunut ilisimatitsissutigineqarsimanersoq

Nuuk, juli 2015

Naja Joelsen

Ineqarneq pillugu Maalaaruteqartarfimmi siulittaasoq

Naatsorsueqqissaarneq

Ineqarneq pillugu Maalaaruteqartarfik ukioq 2014-imi nuna tamakkerlugu inigisanut attartortuniit maalaarutinik katillugit 48-nik tigusaqarpoq, 2013-imi maalaarutit 50-simallutik.
Suliat 38-it naammassineqarput, taakkunannga tallimat ataatsimiititaliap ataatsimiinnerani naammassineqarsimallutik, sinneruttut 33-it itigartitsivigineqarsimapput, akitsuutip akilinngitsoorneratigut, amigartumik piginnaasaqarneq pissutigalugu, naammagittaalliuutigisamut inatsisitigut attuumassuteqannginneq peqqutigalugu, suliakkiissutaagaluamik utertitsiinnarneq pissutigalugu, imaluunniit suliami naammagittaalliuutigineqartup allanngortinnissaa ilimanaateqanngilluinnaraangat.

Suliat itigartitsissutaasut agguataarneqarneri:

8 – itigartitsissutaapput akiligassamik akiliinngitsoorsimaneq tunngavigalugu

21 – amigartumik piginnaasaqarneq tunngavigalugu

1 – inissiaatileqatigiiffiup suliaq qaqeqqippaa, naammagittaalliortullu piumasaa malillugu

1 – maalaarummik unitsitsiinnarneq peqqutigalugu

2 – naammagittaalliuutigineqartup allanngortinnissaata ilimanaateqanngilluinnarnera pissutigalugu

Scroll to Top