imalu aalajangiivoq
AALAJANGIINEQ
Ineqarneq pillugu maalaaruteqartarfik isumaqarpoq, najugaq YYX, illoqarfimmiittoq XXY-mi nalinginnaasumik iluarsartinnera akilissagit.
Inissianik attartortitsisarneq pillugu Inatsisartut peqqussutaat nr 2, 12. maj 2005-imeersoq kingusinnerusukkut allannguuteqartoq naapertorlugu aalajangiisoqarpoq.
Suliami allagaatit:
- X-ip Ineqarneq pillugu Maalaaruteqartarfimmut maalaarutaa 4. maj 2018-meersoq.
- Inissiaatileqatigiiffiup maalaarummut oqaaseqaataa 18. juli 2018-meersoq.
- Maalaartup inissiaatileqatigiiffiup oqaaseqaataanut oqaaseqaataa 18.juli 2018-meersoq.
- Inissiatileqatigiiffiup maalaartup oqaaseqaaseqaateqaqqinneranut oqaaseqaateqaqqinnera 24.juli 2018-meersoq.
- Maalaartup inissiaatileqatigiiffiup oqaaseqaateqaqqinneranut oqaaseqaataa 14.september 2018-meersoq.
- Najukkap qimanneqarneranut atatillugu misissuinermit nalunaarusiaq 17.november 2014-meersoq.
- Naatsorsuineq 15.januar 2015-meersoq.
- Qalipaanermut akiligassaq 20. december 2014-meersoq.
Nassuiaat:
Siornatigut arlaleria Ineqarneq pillugu Maalaaruteqartarfimmut siornatigut inigisimasannut, inissiaq YYX, illoqarfimmiittoq XXY-miittoq pillugu qimalernerani akiligassat pillugit maalaaruteqartarsimavutit. Paasisimavat inissiaq oqunnera pissutigalugu nooreernerpit kingorna attartuisoq nutaaq isertersimasoq taamaattorli aamma taanna isertertoq oquk pissutigalugu qimassimavaa. Taamaasilluni inissiaq taamanili inoqarsimanngilaq. Tamanna pissutigalugu depositummi inissiaq qimannerani iluarsaanneqarnisaaanut 9.800,- kr-iusoq atugassaasimasoq utertikkumasimavat. Aammattaaq qimareernerata kingorna attartuisuusimasunut allattorsimasunik takusaqarusullutit piumasarisimavat.
Ineqarneq pillugu Maalaaruteqartarfiup siornatigut maalaarutit suliariumasimanngilaa ersermat ilalerneqarsinnaanavianngitsutit. Inissiaatileqatigiiffiup aalajangersimavaa inissiaq qimareerakku nutaanik attartortoqarnissaa taamaammallu iluarsaanneqassasoq. Aalajangiinermi allassimavoq Ineqarneq pillugu Maalaaruteqartarfik suliami inissiaatileqatigiiffiup allaffissorneranut atatillugu iliuuseqarsinnaannginnera pissutigalugu suliamik ingerlatsinissaminut pisinnaatitaaffeqannginnera.
Ulloq 4. maj 2018-imi Ineqarneq pillugu Maalaaruteqartarfimmut maalaaruteqaqqissimavutit. Maalaarutinni nutaami ilisimatitsivutit ukiumi 2016-imi inissiaq qimannerani inissiaatileqatigiiffimmi sullissisumiit ilisimatinneqarsimallutit inissiami iluarsaasineq akilissanngikkit inissiap oqunnera pissutigalugu. Ilisimatitsivutit illit nammineerlutit nuunnissaq piumasarisimanagu. Inissiamik nutaamik nassaartoqarpoq nuuffigisassassinnik.
Taamaasillutit isummat depositummi 9.800,- kr-iusoq inissiap iluarsaanneqarnissaanut atugaasimasoq tigoqqikkusullugu inissiami najugaqarsimasoq nuussimanerata kingorna allanik najugaqartoqarsimannginnera pissutigalugu. Inissiamut tassunga nuunnginninni ilisimatinneqarsimavutit inissiami siornatigut imermik ajoquserneqarnikuusimasoq kisialli imermik ajoquserneqarnera aaqqinneqareermat oqummik nassaartoqarsimannginneranik ilisimatinneqarsimavutit.
Ineqarneq pillugu Maalaaruteqartarfiup ilinnut suliaq nangeqqinniarlugu suliareqqippaa siornatigut maalaarutinni ersersimanngimmat inissiap iluarsaanneqarnissaannik akiliisussaannginninnut ilisimatinneqarsimanerit ersarissumik allaqqasimanngimmat.
Najukkap qimanneqarneranut atatillugu misissuinermit nalunaarusiami 17.november 2014-meersumi erserpoq, inissiaq YYX,illoqarfimmiittoq XXY-miittoq ulloq 8. maj 2013-imi tiguarsimagit aammalu ulloq 1. november 2014-imi qimassimagit.
Najukkap qimanneqarneranut atatillugu misissuinermit nalunaarusiaq ilinnit aammalu Inissiaatileqatigiiffimmit sinniisumiit atsiorneqarsimavoq.
Najukkap qimanneqarneranut atatillugu misissuinermit nalunaarusiaq naapertorlugu iikkat aammalu isaariami (B), iggaviup silarliani (D), iggavimmi (F), uffarfimmi (G), inimi (I) aammalu sinittarfimmi (J) qilaat ataasia qalipanneqassasut, aammalu isaariami (B), iggaviup silarliani (D) aammalu uffarfimmi (G) natit eqqiarneqassasut.
Qalipaasumit akiligassamut allagartami ulloq 20 december 2014-meersumi erserpoq, iikkat qilaallu B, D, G aamma J -imiittut qalipanneqarsimapput 8.700,- kr-imoortumut aammalu tamalaani erserpoq natit B, D aammalu G 1.100,- kr-inut anngussimasut, taamaammat akiligassaq ataatsimut 9.800,- kr-iusoq.
Aninermut atatillugu naatsorsukkani erserpoq, 11.109,- kr-inik depositummimik akiliisimasutit. Naliginnaasumik iluarsaasineq 9.800,- kr-inik naleqarsimavoq. Naliginnaasumik iluarsaasinermi ilanngaatit 1.764,- kr-iusimapput taamaammallu inissiaq qimannerani inissiaatileqatigiiffimmiit 3.073,- kr-nik utertooruteqarputit.
Inissiaatileqatigiiffiup Ineqarneq pillugu Maalaaruteqartarfimmut ilisimatitsissutigaa, inissiaatileqatigiiffiup paasinninneratigut imaattoq illit nammineerlutit inissiamik nutaamik piumasimagitit inissiaatileqatigiiffik inissiami YYX-mi oqummik nassaartoqarneranut atatillugu. Aammattaaq taassumap saniatigut maanna sulisuusunikinissiamut naliginnaasumik iluarsaasisoqarnissaanut akiliissannginnerit pillugu oqaaseqaateqartoqarsimanissaanik nalunnginnittunik peqanngitsoq.
Inissiaatileqatigiiffiullu ilinnut ulloq 30. september 2014-imi allagaatini oquk pillugu maalaaarutit pillugu innersuuppaa. Tassani erserpoq, inissiaatileqatigiiffiup allamut nuunnissannut piumasaqaatit piviusunngortikkusukkaa aammalu inissiaatileqatigiiffiup taamaasilluni uppernarsaraa inissiamik nutaamik nassaarnermi inissiamut massakkut attartugarnut isumaqatigiissut atuutsikkunnarsissagaa. Aammattaaq erserpoq, inissiami aaqqissugassaasoq eqqarsaatigissanngikkaanni inissiap ilaa malittarisassat naapertorlugit iluarsaanneqarumaartoq.
Allakkamittaaq erserpoq, inissiamut nutaamut nutsernermut aningaasartuutinut 1.200,- kr-inik matussuserneqassasut aammalu inissiamiittuni inimut ataasiakkaanut 1.000,- kr-inik tunineqarumaartutit.
Inissiaatileqatigiiffiup akissutaanut atatillugu oqaatigaat inissiaatileqatigiiffiup nammineerluni oquk pissutigalugu nutaamik initaarnissat innersuussimagaa. Aammattaaq sullissisoq taanna allakkami 30. september 2014-meersumi atsiortuusoq tassaasimavoq taannarpiaq oqarsimasoq, qalipaassanngitsutit nateq qupparlugu ammarterneqarluni iluarsaanneqartussaanera pissutigalugu. Ilisimatitsissutigaat nutsernissamut aningaasartuutinut 2.200,- kr-inik matussusiisoqarsimasoq.
Kingorna E-mailikkut ilisimatitsissutigaat inissiami oqummik nassaartoqareernerani sullissioq neqeroorsimasoq inissiamik nutaamik nassaartoqarsinnaasoq taamaasillusi nutserfigisinnaasassinnik.
Ineqarneq pillugu Maalaaruteqartarfimmut maalaarummik allamik 2014-imeersumik suliaqarnermi erserpoq, inissiami YYX-miit nutsernermut atatillugu inigisamut akiliutit pillugit inissiaatileqatigiiffimmiit nassuiaammi 26. november 2014-imik ullulerneqarsimasumi ersertoq, oquk pissutigalugu inissiat qimassagit nutaamullu inissiamut nuuneqartariaqartutit. Tamatumunga tunngatillugu inissiaatileqatigiiffiup maalaarummut nutaamut oqaaseqaateqarnermini ilisimatitsissutigaa taamani sullississuusimasoq nassuiaammillu allassisuusimasoq suliunnaarsimanerani paasiniaaffigineqarsinnaasimanngitsoq qanorpiaq tamanna paasisassaneranik. Taamaasillunilu inissiaatileqatigiiffiup allagaat ilinnoortoq 30. september 2014-meersoq pingaartissimavaa. Tamatumunga tunngatillugu inissiaatileqatigiiffiup ilisimatitsissutigaa taamani sullississuusimasoq allakkamillu allattuusimasup oqaasiinnakkut oqaatigineqarsimasumik paasiniaaffigineqarsinnaasimanngitsoq qanorpiaq tamanna paasisassaneranik taanna pineqartoq sulisuujunnaarsimammat.
Inissiaatileqatigiiffiullu ilisimatitsissutigaattaaq, inissiamiit nutserniarnermut aningaasartuutinut matussusiissutissanik neqeroorfigineqarsimasutit inissiaq nutserfiusussaq imermik ajoquserneqarsimanera pissutigalugu taammammallu illit ilaquttatillu allamut utaqqiisaagallartumik najugassassinnik neqeroorfigineqarsimasusi.
Inissiaatileqatigiiffiuttaaq ilisimatitsissutigaa, inissiami oqummik eqqorneqarsimanngitsumi naliginnaasumik iluarsaasisoqarsimanera aammalu tamatumunga atatillugu inissiaq qimalerneranut akiligassaasut ilinnut tussimasut.
Ineqarneq pillugu Maalaaruteqartarfimmut inissiaatileqatigiiffiup ilisimatitsissutigaa, attartuisoq tullinnguuttuusimasoq oquk pissutigalugu nuussimasoq aammalu inissiaatileqatigiiffiup nalilersorpaa aatsaat illit nutsereernerpit kingorna tamanna pillugu sukumiisumik iluarsaasinissaq aallartinneqarsimanera.
Tamatumunngalu atatillugu inissiaatileqatigiiffimmiit qulaatungaani allassimasut aallaavigalugit tusarniarneqarsimavutit. Tamatumungalu atatillugu ilisimatitsivutit taamani sulisuusimasup maannalu sulissuusup ilisimatissimagaatit illit qalipaasoqarnissaanut akiliissanngitsutit.
Inatsisitigut tunngavigisaq:
Inissianik attartortitsisarneq pillugu Inatsisartut peqqussutaat nr.2, 12. maj 2005-imeersumi § 45 imm. 3-mi erserpoq, Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit.
Peqqussummi tassani § 77-imi erserpoq, Inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iiganik qalipaaneq aamma/imaluunniit ungalitsersuineq kiisalu eqqiaaneq. Natii nutaamik lakkersimasutut isikkoqassapput, taamaattorli tak. imm. 3.
- 78 naapertorlugu Attartortitsisup § 77 malillugu nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai. Piffissaliussatut aalajangiunneqartup naannginnerani inissiamit anisoqarnerani attartortup taamaallaat aningaasat piffissami tassani attartortitsinerup atorunnaarfigisaani attartortitsisumit akilerneqartussanngorsimanngitsut akilissavai.
Aalajangersakkat inatsisitigut tunngavigisani ataani tamakkerlugit ilanngunneqarsimapput.
Naliliineq:
Ineqarnermut Maalaartarfik isumaqarpoq, inissiap nalinginnaasumik iluarsartinneqarnera akilissagit.
Tamatumunga tunngavilersuutaavoq peqqussummi § 77-imi allaqqanera, inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iigaanik qalipaaneq aamma/imaluunniit ungalitsersuineq kiisalu eqqiaaneq. Natit nutaamik lakkersimassasut.
Ineqarneq pillugu Maalaaruteqartarfiup pingaartippaa, Illit nammineerlutit Najukkap qimanneqarneranut atatillugu misissuinermit nalunaarusiaq atsiorsimagakku aammalu tamatumunga saniatigut taakkartorneqartunik oqaaseqaateqarnak aammalu inissiaatileqatigiiffimmiit nutsilernermi akiliisussaannginnerit pillugu paasitinneqarsimanerit pillugu uppernarsarsinnaasimannginnerit.
Attartuisoq tulliusoq oquk pissutigalugu nutsersimanera pisinnaatitaalinngilaatit naliginnaasumik iluarsaasinermut akiliutit utertinneqarnissaanut. Ineqarneq pillugu Maalaaruteqartarfiup inissiaatileqatigiiffiup inissiaq inissiatut atorunnaarsinniarnissaanut aalajangiinissaanut isummernissaminut pisinnaatitaanngilaq. Inissiaatileqatigiiffiup inissiaq attartorteqqissinnaanissaanut aalajangersinnaatitaavoq taamaammallu inissiaq qimalernerani naliginnaasumik iluarsaasinissaq pisarpoq.
Allaffissornermut tunngasut pissutaallutik piffissaq suliamik suliarinninnermut atorneqartoq taama sivisutigisumik ingerlanneqarnera Ineqarneq pillugu maalaaruteqartarfiup ajuusaarutigaa.
Aalajangiineq:
Ineqarneq pillugu Maalaaruteqartarfiup inissiaateqarfiup aalajangiinera atuutsiinnartippa.
Naammagittaalliuuteqarnissamut ilitsersuut:
Ineqarneq pillugu Maalaaruteqartarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq Inissianik attartortitsisarneq pillugu Inatsisartut peqqussutaanni nr. 2-mi, 12. maaji 2005-imeersumi kingusinnerusukkullu allanngortinneqartumi, § 86 tak. 7 naapertorlugu.
Ineqarneq pillugu Maalaaruteqartarfiup aalajangiinera eqqartuussisunut suliassanngortinneqarnissaa kissaatigineqarpat, attartortitsisumik sassaqqusissut, tassa Namminersorlutik Oqartussat imaluunniit kommuni Kalaallit Nunaanni Eqqartuussivimmut tunniunneqassapput.
Inussiarnersumik inuulluaqqusillunga
Naja Joelsen
Ineqarneq pillugu Maalaaruteqartarfimmi siulittaasoq
Ilanngussaq: Inatsisitigut tunngavik
Assilinera Inissiaatileqatigiiffik XXY-mut. Allakkat nr. innersuussutigineqarpoq XX-XXX-XXXX-XXX