Suliffeqarfiit atuisutik isumaqatigisimagunikkit, imaluunniit inatsisitigut arlaatigut ilanngunneqarsimappat, akitsuusiinissaminnut pisinnaatitaatitaapput.
Suliffeqarfiit akitsuusiinerat aallaavimminni inatsitigut aaqqiiffigineqanngillat. Taamaattumik suliffeqarfiup atuisuminnut suut akitsuutit atussanerlugit nammineq aaliangiisinnaatitaavoq.
Tuniniaanissamik nittarsaassisarneq pillugu inatsimmili suliffeqarfimmut nammineq isumaqatigiissuteqarluni akitsuusiinerit aaqqiiffigineqarsinnaasut sorliunersut allaqqapput. Assersuutigalugu isumaqatigiissusiortarnerit nutartertartuni allannguinerniluunniit akilernissaanut akuereriikkatit akitsuusiinerit atuutsinneqarsinnaapput. Akilersuinissamut isumaqatigiissutini allat isumaqatigiissuteqarnermut inatsimmi maleruagassat aaliangersimasut atorlugit aaqqiisoqartarpoq.
Akitsuut aaliangersimasoq pillugu inatsimmi allaqqasoqanngippat, taava suliffeqarfik aallaavittut nammineq akitsuusiissanerluni aaliangiisinnaavoq. Suliffeqarfiup nammineq akitsuutip annertussusaa akulikitsigineralu qanorlu piumaneqartassanersoq inississinnaavaa.
Atuisutut, isumaqatigiissusiunnginninni imaluunniit pisinnginninni, suut akitsuutit periarfissarinerlugit paasisaqaannartussaavutit.
Akitsuut assigiinngitsutigut isumaqatigiissutigineqarsinnaavoq. Isumaqatigiissut pappialaasumi, isumaqatigiissummi assigisaaniluunniit takuneqarsinnaassaaq, taannalu illit suliffeqarfik peqatigalugu sanassavarsi. Aamma suliffeqarfiup piumasaqaataani imaluunniit nalinginnaasumik isumaqatigiissutinut piumasaqaammi takuneqarsinnaavoq.
Akitsuut isumaqatigiissummut ilaagaluartoq, aamma piumanissaa maannakkut pisut tunngavigalugit naammannginanngissinnaavoq, imaluunniit akitsuut annertuallaarsinnaalluni. Akitsuut naammaginanngippat, taava isumaqatigiissut allanngortinneqarsinnaavoq, tassanilu akiliinissat pisariaarussinnaavoq annikinnerusumilluunniit akiliisinnallutit.
Akitsuutit nalinginnaasumik isumaqatigiissutitut ilaatillugit
Nalinginnaasumik isumaqatigiissut qularnaveeqqusiinermut isumaqatigiissutaasinnaavoq, atornermut isumaqatigiissut, mobilimut abonnement imaluunniit fitnesscenterimut ilaasortaanermut isumaqatigiissut.
Isumaqatigiissummi taamak ittumi aaliangersimasunik akitsuuteqartoq nalinginnaasuuvoq, assersuutigalugu allaffissornikkut akitsuut, soraarniuteqarnermut akitsuut, imaluunniit akiligassiinermut akitsuut.
Akitsuutit qaffakkiartortut
Suliffeqarfiup akitsuutit allanngortittarnissai kissaatigippagu, assersuutigalugu akit qaffakkiartorneri malitsigalugit qaffaasarneq atorneqassaguni, isumaqatigiissummi allaqqassaaq. Qaffaasoqarnikkut qaffaassutissat nutaat pillugit ilisimatinneqassaatit.
Akitsuutit nutaat
Suliffeqarfik nutaanik akitsuuseerusukkuni, taava isumaqatigiissutip allanngortinnissaa pisariaqarpoq.
Isumaqatigiissummik allannguineq piffissaq atorluarlugu nalunaarutigineqassaaq, taava illit nutaamut isumaqatigiissuteqarusunngikkuit, isumaqatigiissuteqarunnaarnissannut periarfissaqassaatit.
Atuisunut ataasiakkaanut isumaqatigiissutaareersumi annertuumik allannguisoqassappat, ersarissumik nalunaarutigineqajaarnissaa pingaaruteqarpoq. Suliffeqarfik aviisitigut pilerisaaruteqarnermi nalunaaruteqaruni nittartakkaminiluunniit paasissutissiiguni naammanngilaq.
Isumaqatigiissuteqarunnaarnissamut pisinnaatitaaneq
Nutaanik akitsuuteqalertillugu imaluunniit akitsuutaareersut qaffanneqarnerini, akiitsut nutaat atuutsinneqalersinnagit isumaqatigiissuteqarunnaarsinnaavutit.
Isumaqatigiissuteqarunnaarsinnaaguit, suliffeqarfiup akitsuutinik allannguinissaminik nalunaaruteqarnermini tamanna pillugu allakkatigut ilisimatissavaatit. Taamaasiunngikkuni tuniniaanissamik nittarsaassisarneq pillugu inatsit naapertorlugu akiligassinneqarsinnaavoq.
Akileeqqussummut akitsuutit aamma aningaasanik akiliisitsiniaanermut akitsuutit
Suliffeqarfik maleruagassat malillugit kingusinaartumik akiliisoqarsimappat, isumaqatigiissummi allaqqanngikkaluartoq, akileeqqussummut aamma aningaasanik akiliisitsiniaanermut akitsuutinik piumasaqarsinnaavoq. Akitsuutit taakkua piumasaqaatiginiaraanni, inatsimmi aaqqiinissamut tunngasunik piumasaqaateqassaaq.
Kortimik akiliinermi akitsuutit
Suliffeqarfiit kortimik akiliisunut akitsuusiinissaminnut piumasaqaateqarsinnaapput. Tamannali akitsuusiineq, assersuutigalugu karsimi, ersarissumik ilisimatitsiissutigineqassaaq.
Aningaasanik akiliinermi akitsuusiisoqaqqusaanngilaq, aningaasat nalertik atuinnartuussaammassuk.