AALAJANGIINEQ
Ineqarneq pillugu maalaaruteqartarfik isumaqarpoq, ilissi inigisassi iluata qalipannissaannut namminneq aningaasartuutit akisussaaffigissagisi.
Kiassarnermut aamma innaallagissamut akiligassat annertussusii pillugit Ineqarnermut naammagittaalliuuteqartarfik suliaqarnissaminut pisinnaatitaanngilaq.
Nassuiaat:
Attartornermut isumaqatigiissut illit >>A<<, Inissiaatileqatigiiffiullu akornassinni pisumi erserpoq, inissiaq >>X<< -miittoq ulloq 5. januaari 1998-imi iserterfigisimagit.
Ulloq 3. maaji 2014 Ineqarneq pillugu maalaaruteqartarfik maalaarummik ilissinniit tigusaqarpoq, 29. apriili 2014-imik ullulerneqarsimasumik. Maalaarutigaarsi inigisassi qalipanneqarsimannginnera aammalu kallerup inneranut kiassarneqarnermullu aningaasartuuteqangaatsiartarnersi. Aammattaaq maalaarutigaarsi Inissiaatileqatigiiffimmut saaffiginnissutigisartakkasi pillugit Inissiaatileqatigiiffimmit allakkatigut akissummik tigusaqarsimannginnersi.
Ineqarneq pillugu maalaaruteqartarfimmut allakkami 16. juuni 2014-imeersumi, Inissiaatileqatigiiffik allassimavoq, ineqarfiup iluatungaani iluarsaanermi qalipaanissamut pisussaatitaanngitsoq. Inissiaatileqatigiiffik allappoq, attartuisoq inissiap iluatungaata qalipannissaanut nammineq pisussaasoq, aammalu Inissiaatileqatigiiffik silataatungaani iularsaanermi pisussaatitaasoq.
Inissiaatileqatigiiffiup allakkamini Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersumi § 45 imm. 3. innersuussimavaa, tassanilu allassimavoq, piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit.
Inatsisitigut tunngavigisaq:
Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersumi § 45 imm. 1-mi erserpoq, Namminersornerullutik Oqartussat kommuunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigaa.
Imm. 2. Avammut kuuffinnut, kiassarnermut, innaallagissamut, gassimut imermullu teknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikkiussat, matserfiit, kiassaatit, ruujorit, sikaaviit alaakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnikkut pisoqalinikkullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.
Imm. 3. Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit.
Peqqussummi § 88-imi ,§ 45, imm. 3-mi erserpoq attartornernut, 1. januar 1990 sioqqullugu aallartissimasunut malittarisassat atuutissanngillat. Taannalu malillugu illuatungertut inissianik 1 januar 1990 kingorna aallartissimasunut peqqussummi § 45 imm. 3 atuutissallutik.
Peqqussummi tassani § 84, nr 2 naapertorlugu Ineqarneq pillugu maalaaruteqartarfiup attartortut aserfallatsaaliuineq iluarsaassinerlu pillugit maalaarutaat suliarisarpai. tak. § 45.
Ineqarneq pillugu maalaaruteqartarfiup piginnaasai Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersumi kingusinnerusukkullu allannguuteqartumi § 84-imi tamakkiisumik allattorneqarsimapput
Peqqussummi tassani erserpoq, Ineqarneq pillugu maalaaruteqartarfiup attartortut maalaarutaat makkununnga tunngasut suliarisarpai:
- Ineqarnermut akiliutinik qaffaanissamik siumoortumik ilisimatitsisarnermi piumasarisat, tak. § 28, imm. 2.
- Aserfallatsaaliuineq iluarsaassinerlu, tak. § 45.
- Inissiap iserterfigineqarnerani qanoq issusia, tak. § 47
- Attartukkami atortut ikkussukkat pitsanngorsaanerillu (atuisinnaatitaaneq), tak. §§ 51 aamma 55.
- Attartortup atukkaminik atuinera (torersaanissamik malittarisassanik unioqqutitsinerit), tak. § 50.
- Atuisinnaatitaanerup allanut tunniunneqarnera (inissianik paarlaateqatigiinneq, attartukkamik allamut attartortitsigallarneq aamma attartornermik nangitsineq), tak. §§ 58-62.
- Inissiamit aninermi inissiap qanoq ittuunera (iluarsaassineq nalinginnaasoq), tak. § 77.
Naliliineq:
Ineqarneq pillugu maalaaruteqartarfik isumaqarpoq, ilissi inigisassi iluata qalipannissaanut nammineq aningaasartuutit akisussaaffigissagisi.
Tamatumunga tunngavilersuutaavoq, inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersumi ,§ 45, imm. 3 naapertorlugu attartuisoq piffissami 6. januaari 1998-imiit aammalu attartuisup attartuinera ataavartillugu inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat akisussaaffigigaa taakkununngalu aningaasartuutit akilissagai.
Ineqarneq pillugu maalaaruteqartarfiup aalajangiinermini pingaartippaa paasissutissutaasimasut aallaavigalugit, inissiap nalinginnaasumik iluani qalipaanissat pineqarnera, tamannalu attartuisup peqqussummi § 45, imm. 3. naapertorlugu nammineerluni akisussaaffigimmagu. Taamaasilluni inissiap iluatungaani qalipaanissaq inissiat aserfallatsaaliornissaanut attartuisup pisussaatitaaffiata peqqussummi § 45 imm. 1 aamma § 45, imm. 2. naapertorlugit avataaniinnera pimmat.
Ilisimatitsissutigineqarpoq inissiaatileqatigiiffiup 2014-imi aasaanerani inissiassi silataatungaa qalipanneqarsimasoq.
Maalaarutissinnut kallerup inneranut kiassarneqarnermullu atatillugit Ineqarneq pillugu maalaaruteqartarfiup piginnaasai peqqussummi nr. 2, 12. maaji 2005-imeersumi § 84-imi tamakkiisumik allattorneqarsimasut avataaniipput. Maluginiaqquneqarporli tamatumunnga tunngatillugu isumaqarussi Inissiaatileqatigiiffiup pisussaattaaffini aallaaviginagu inigisassinnut kallerup inneranut kiassarneqarnermullu aningaasartuutit annertuallaartarnerat pissutaasoq taava tamanna pillugu Inissiaatileqatigiiffik attavigissavarsi. Attartuisup inissiat aserfallatsaaliornissaanut pisussaatitaanera peqqussummi § 45, imm. 1 aamma § 45, imm. 2.-mi erserpoq.
Inissiaatileqatigiiffiup allakkatigut tunngavilersuinissaa pillugu maalaaruutissinnut atatillugu, Ineqarneq pillugu maalaaruteqartarfiup maluginiaqqussavaa, Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juuni 1994-imeersumi § 23 imm. 1 naapertorlugu, aalajangiinermik oqaasiinnakkut nalunaarfigineqartup aalajangiineq imminik tapersiisuulluinnanngippat piumasarisinnaavaa aalajangiinermut tunngaviusoq allaganngorlugu piumallugu. Allakkatigut aalajangiiffigineqarnissamut qinnuteqaat oqartussaasunut saqqummiunneqassaaq aalajangiinermik nalunaarutip suliami peqataasumit tiguneqarnerata kingornagut ullut 14-it qaangiutsinnagit. Ineqarneq pillugu maalaaruteqartarfiup nalilerpaa, ilissi – qanorluunniit Inissiaatileqatigiiffik suliassat suliarineqartarnerat pillugu inatsimmi ilaagaluarpataluunniit – Inissiaatileqatigiiffimmut allakkatigut itigartitsilluni aalajangiinermut tunngavilersummik piumasinnaavusi, tamannalu ilissinnut tunniutissavaa.
Naammagittaalliuuteqarnissamut ilitsersuut:
Ineqarnermut Naammagittaalliuuteqartarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq, Inissianik attartortitsisarneq pillugu Inatsisartut peqqussutaanni nr. 2-mi, 12. maaji 2005-imeersumi kingusinnerusukkullu allanngortinneqartumi, § 86, imm. 7 naapertorlugu. Attartortitsisup attartortullu akornanni aaqqiagiinnginneq eqqartuussivilersuukkumaneqassappat attartortitsisumut sassaqqusissut eqqartuussivimmut tunniunneqassaaq. Tamanna pissaaq, allaqatigiinnerit il.il. attartortitsisup allaffeqarfittut aktiaatileqatigiiffianit isumagineqarsimagaluarpataluunniit.
Ineqarneq pillugu maalaaruteqartarfiup aalajangiineri Namminersornerullutik Oqartussanut kommuninullu, inissianik attartortitsisuusunut pinngitsoorani malinneqassapput, § 86, imm. 6 naapertorlugu.
Inussiarnersumik inuulluaqqusillunga
Naja Joelsen
Ineqarneq pillugu Maalaaruteqartarfiup siulittaasua