Neqerooruteqartitsinermi Maalaaruteqartarfik
Atuisartoqarnermut Unammilleqatigiinnermullu Aqutsisoqarfik Pisortat Pisiortortarneranni Neqerooruteqartitsinermi Maalaaruteqartarfimmut (Neqerooruteqartitsinermi Maalaaruteqartarfik) allattoqarfiuvoq.
Neqerooruteqartitsisarnermi Maalaaruteqartarfiup inatsisit ataani allaqqasut unioqqutisoqarsimaneranut tunngasunik maalaarutinik suliaqartarpoq:
- Pisortat oqartussaaffigisaanni suliffeqarfiinilu nioqqutissanik kiffartuussinernillu pisiniarnermut tunngatillugu neqerooruteqartitsisarneq pillugu Inatsisartut inatsisaat nr. 6, 12. juni 2019-imeersoq (Neqeroorusiortitsinermi inatsit)
- Sanaartornermi neqerooruteqartitsisarneq pillugu Inatsisartut inatsisaat nr. 11, 2. december 2009-meersoq (Neqerooruteqarnermi inatsit)
Neqerooruteqartitsisarnermi Maalaaruteqartarfiup suleriaasia uani inatsimmi allaqqavoq:
- Pisortat Pisiortortarneranni Neqerooruteqartitsinermi Maalaaruteqartarfik pillugu Inatsisartut inatsisaat nr. 7, 12. juuni 2019-meersoq.
- Suliffeqarfiit sanaartugassamik neqeroorummik pinngitsoorsimasut
- Suliffeqarfiit qinnuteqartuusimasinnaasut imaluunniit neqeroorusiortitsinermi inatsisit malillugit pisimasuuppat pisiortorfimmut neqeroorusiortuusimasinnaasimagaluarpat
Aammattaaq kattuffiit aamma pisortani oqartussat Naalakkersuisunit maalaaruteqarsinnaatinneqartut.
Suliami peqataasunngorsinnaasumut avataaneersumut (tredjepart) suliaq immikkuullarissutut sunniuteqarpat, Neqerooruteqartitsinermi Maalaaruteqartarfiup maalaarutigineqartoq imaluunniit maalaaruteqartoq sinnerlugu suliamut peqataasunngortissinnaavaa. Taamaakkaluartoq suliami peqataasoq avataaneersoq nammineq maalaaruteqarsinnaatitaanngilaq.
Maalaarut ilanngussallu maalaarummut tunngasut allaganngorlugit nassiunneqassapput:
- aua@nanoq.gl -imut imaluunniit
- allakkatigut Atuisartoqarnermut Unammilleqatigiinnermullu Aqutsisoqarfik, Imaneq 29, 1. sal, 3900 Nuuk
Kingusinnerpaamik maalaarutip ullulerneqarnerani, maalaarutigineqartoq allaganngorlugu maalaarut pillugu nalunaaruteqarfigissavat. Eqqaamassavattaaq nalunaarutivit assilineqarnera Neqerooruteqartitsinermi Maalaaruteqartarfimmut maalaaruteqarninni ilanngutissagakku.
Aalajangiissutip imaluunniit suliap ingerlanneqarneranut tunngasumik aalajangiinerup (beslutning) ullulerneqarneraniit sapaatip akunneri sisamat qaangiutsinnagit maalaaruteqarnissaq inatsisitigut killeqartinneqarpoq.
Neqerooruteqartitsinermi Maalaaruteqartarfiup suliami peqataasup piumasaqaataanik annerusumik aalajangiissuteqarfigisinnaanngilaa.
Neqerooruteqartitsinermi Maalaaruteqartarfiup suliami peqataasut suliamut saqqummiunneqarsimasaat kisiisa tunngavigalugit nalilersuisarpoq.
Maalaarummik sullissineq maalaarummut akiliut akilerneqarnaraniik aallartittarpoq.
Maalaarummut akiliutip akilerneqarfissaa maalaaruteqarnermiit sapaatip akunneri sisamaapput. Maalaaruteqarnermut akiliut piffissarititaasoq eqqorlugu akilerneqarsimanngippat, kalerreeqqaarneqanngitsumik maalaarut atorunnaarsinneqassaaq.
Maalaarummut akiliut Atuisartoqarnermut Unammilleqatigiinnermullu Aqutsisoqarfiup konto-anut 6471 kontonr. 1639061. Qulequtalerfissaanilu ima innersuussillutit: ”UKN klage [maalaarutip ullulerneqarnera]”.
Akiliutigineqartut angissusaat:
Pisortat oqartussaaffigisaanni suliffeqarfiinilu nioqqutissanik kiffartuussinernillu pisiniarnermut tunngatillugu neqerooruteqartitsisarneq pillugu Inatsisartut inatsisaat nr. 6, 12. juni 2019-imeersoq naapertorlugu: 10.000 kr.
Sanaartornermi neqerooruteqartitsisarneq pillugu Inatsisartut inatsisaat nr. 11, 2. december 2009-meersoq naapertorlugu: sanatitsisup sanasussallu akissaanik isumaqatigiissutaata 1%-ia, annerpaamik 100.000 kr.
Neqerooruteqartitsisarnermi Maalaaruteqartarfiup maalaarut itigartissinnaavaa, maalaarut sullissinnikkut suliarissallugu tunngavissaqanngippat.
Itigartitsisoqartillugu maalaaruteqarnermut akiliutaasoq utertinneqassaaq.
Neqerooruteqartitsisarnermi Maalaaruteqartarfiup maalaarutigineqartoq piffissalissavaa, periarfissillugu suliassap pisimasuviata pissusaa aammalu eqqartuussisutigoortumik tunngavilimmik pisimasut nassuiaatigissallugit.
Neqerooruteqartitsisarnermi Maalaaruteqartarfik paasissutissanik suli amerlanerusunik naammagittaalliortumut piniarsinnaavoq, taamatuttaaq naammagittaalliutigineqartoq avataaniittullu paasissutissanik piniarfigineqarsinnaapput.
Suliassaq allattariarsorluni piareersarneqarlunilu aalajangersorneqassaaq. Kisianni Neqerooruteqartitsisarnermi Maalaaruteqartarfiup siulitaasuata oqaloqatigiilluni isumaqatigiinninniarneq akuerisinnaavaa.
Oqaloqatigiilluni isumaqatiginninniartoqassagaluarpat taava tamanut ammasuusinnaanngilaq. Taamaattoq Neqerooruteqartitsisarnermi Maalaaruteqartarfiup siulittaasua immikkut ittumik pisoqartillugu akuersisinnaatitaavoq tamanut ammaqqullugit.
Neqerooruteqartitsisarnermi Maalaaruteqartarfiup aalajangersugai tunngavilersuutaasut ilanngullugit naamagittaalliortumut, malaarutigineqartumut aammalu soqutiginnitsinut allanut suliassamut ilanngunneqarsimasunut nassiunneqassapput.
Suliassap annertussusaa apeqqutaalluni suliassap suliarinerata piffissatigut sivisussusissaanut aalajangiisuussaaq.
Aalangiisoqartinnagu atuutsitsisinnaannginneq imatut paasisariaqarpoq, maalaarutigineqartoq eqqarsaatigalugu susoqarnissaa takoqqaarumallugu aalajangiiffigineqarnissaa utaqqeqqaarneqassasoq.
Maalaarut aallaavittut isigalugu aalajangiisoqartinnagu atuutilersinnaanngilaq
Neqerooruteqartitsisarnermi Maalaaruteqartarfik atsaat immikkut ittumik pisoqartillugu aalangiisoqartinnagu atuutsitsisinnaannginneq pingaartissinnaavaa.
Neqerooruteqartitsisarnermi Maalaaruteqartarfik aatsaat immikkut ittumik pisoqartillugu aalangiisoqartinnagu atuutsitsisinnaannginneq pingaartissinnaavaa imatut pisoqarpat:
- Ilimanarpat maalaaruteqartoq suliassami taperserneqassasoq,
- Maalaaruteqartoq soqutigisani allatut illersorsinnaanngikkai, aalajangiisoqartinnagu atuutsisisoqanngippat, aamma
- Soqutigisat assigiinngitsut kattunneri apeqqutaatillugit aalajangiisoqartinnagu atuutsitsilersitsisoqassanngippat, imatut paasillugu: Neqerooruteqartitsup soqutigisai tassalu neqeroortitsineq ingerlaannassasoq aammalu maalaartup soqutigisai ataatsimut isigalugit aalajangiisoqartinnagu atuutsitsilersitsisoqarsinnaanngippat.
Neqerooruteqartitsisarnermi Maalaaruteqartarfiup piginnaatitaaffii:
- Maalaarutigineqartup neqerooruteqartitsisarnerata suleriaasiisa atorunnaarsissinnnaavaa, imaluunniit aalajangigai neqerooruteqartitsinermik suliamik niuertoqartillugu atorunnaarsissinnaallugit,
- Maalaarutigineqartup aalajangersugai inerteqqutaasut imaluunniit neqerooruteqartsitsinera atorunnaarsissinnaallugit,
- Peqqusisinnaavoq neqerooruteqartitsinerup inatsisitigut akuerisaasumik ingerlanneqaqqullugu, imaluunniit neqerooruteqartitsinerup niuerpalaarnerani aalajangersukkat akuerisaasumik aalajangeqqullugit.
Akiliisussanngortitaasoqarsinnaavoq:
- Piaaraluni mianersuaalliornikkut Neqerooruteqartitsisarnermi Maalaaruteqartarfimmut eqqunngitsunik paasinerluutaasinnaasunilluunniit tunniussisoqarpat
- Neqerooruteqartitsisarnermi Maalaaruteqartarfiup inerteqqutigisai peqqussutaaluunniit naalanneqanngippata
Inuinnartut aamma inatsisilerinermut tunngasutigut innuttaasutut akiliisitsisoqarsinnaavoq.
Neqerooruteqartitsisarnermi Maalaaruteqartarfiup aalajangigai Atuisartoqarnermut Unammilleqatigiinnermullu Aqutsisoqarfiup nittartagaatigut tamanut saqqummiunneqartassapput.
Neqerooruteqartitsisarnermi Maalaaruteqartarfiup aalajangigai allaffissornermut qullersaasunut ingerlateqqinneqarsinnaanngillat.
Neqerooruteqartitsisarnermi Maalaaruteqartarfiup aalajangigai eqqartuussivinnut ingerlateqqinneqarsinnaapput, tamannalu pissalluni kingusinnerpaamik pineqartunut nalunaaruteqareernerata kingorna sapaatit akunnerit 8 qaangiutsinnagit. Neqerooruteqartitsisarnermi Maalaaruteqartarfiup aalajangigai piffissaritaasup iluani eqqartuussivinnut ingerlateqqinneqanngippat, taava aalajangiineq inaarutaavoq.
Neqerooruteqartitsisarnermi Maalaaruteqartarfik siulittaasumik ataatsimik minnerpaamillu ilaasortanik suliamut ilisimasalinnik marlunnik ilaasortaqarpoq. Siulittaasoq Nunatta eqqartuussisuuneranit toqqarneqassaaq. Suliamut ilisimasallit Naalakkersuisunit toqqarneqassapput pisortani suliaqartartunit aamma inuussutissarsiortuniit innersuuteqartoqarnera malillugu.
Piffissatigut atuuffissami 1. maaji 2024-miit 30. april 2028-imut Neqerooruteqartitsisarnermi Maalaaruteqartarfik makkuninnga ilaasortaqarpoq:
- Jakob Julskjær, siulittaasoq, taassumalu sinniisua Andreas G. Husum
- Freja Lisby Nielsen, kommunet peqatigiillutik toqqagaat
- Janus Schädler Honoré, taassumalu sinniisua Anita Hoffer, Sulisitsisut inassutaat toqqammavigalugu
- Pisortat Pisiortortarneranni Neqerooruteqartitsinermi Maalaaruteqartarfik pillugu Inatsisartut inatsisaat nr. 7, 12. juni 2019-imeersoq (Neqeroortitsisarnermi maalaartarnermut inatsisit)
- Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaata allanngortinneqarneranik, inissianik attartortitsisarneq pillugu Inatsisartut peqqussutaata allanngortinneqarneranik, unammilleqatigiinneq pillugu Inatsisartut inatsisaata allanngortinneqarneranik, siusinaartumik pensionisiat pillugit Inatsisartut inatsisaata allanngortinneqarneranik, Pisortat Pisiortortarneranni Neqerooruteqartitsinermi Maalaaruteqartarfik pillugu Inatsisartut inatsisaata allanngortinneqarneranik aamma pinngortitamik illersuineq pillugu Inatsisartut inatsisaata allanngortinneqarneranik Inatsisartut inatsisaat (Naammagittaalliuuteqartarfiit suleriaasiisa aalajangersarneqartarnerannut maleruagassanik allanngortitsineq)
- Pisortat oqartussaaffigisaanni suliffeqarfiinilu nioqqutissanik kiffartuussinernillu pisiniarnermut tunngatillugu neqerooruteqartitsisarneq pillugu Inatsisartut inatsisaat nr. 6, 12. juni 2019-imeersoq (Neqerooruteqartitsisarnermut inatsisit)
- Sanaartornermi neqerooruteqartitsisarneq pillugu Inatsisartut inatsisaat nr. 11, 2. december 2009-meersoq (Neqerooruteqartitsisarnermut inatsisit)
- AP 95 – Kalaallit Nunaanni sanaartornermi suliassat atortussallu tunniunneqartarneri pillugit ataatsimoortumik piumasaqaatit (Maluginiaqquneqarpoq: Una atuarneqarsinnaasoq qallunaatuujummat)
Neqerooruteqartitsinermut Maalaruteqartarfimmiit aalajangiinerit:
2023.11.08 Kinguartitsissutitut sunniuteqarnissaa pillugu ilaannakuusumik aalajangiineq
2023.03.09 Brøndum Grønland A/S akerleralugu Qeqqata Kommunia
2021.07.28 MT Højgaard Grønland ApS Ineqarnermut attaveqatigiinnermullu Naalakkeruisoqarfianut
2021.04.15 Frederikshåb Betoncentral ApS akerleralugu Kommuneqarfik Sermersooq
Siornatigut Neqerooruteqartitsinermut Maalaruteqartarfikumi aalajangiinerit:
2018.02.21 Nuummi inissiat attartortittakkat pillugit illuutinut sullissinermut
2017.10.23 Nanortalimmi iliveqarfiup allineqarnissaa
2017.10.23 Kommune Kujallermut arsartarfiit ivigaasanik qallikkat pingasut
2017.01.03 Nuummi Vandsøvej-imi ajornartoorfimmi innaallagissiorfimmik isaterineq
2012.09.07 Tasiilami inissiat 10-t
2012.06.27 Qasigiannguani kiassaateqarfimmik iluarsaassineq innaallagisserineq maskiinalerinerlu
2012.06.06 Tasiilami inissiat 10-t (Atuuttussanngortitsinissamik)
2012.03.19 Assaquttami aasarsiortarfiup ingerlanneqarnera
2011.11.28 Nukissiuutit nalunaarsornissaannut aamma nukissiuutinut iliuusissatut
Pisortat Pisiortortarneranni Neqerooruteqartitsinermi Maalaaruteqartarfimmut nuierneq pillugu aaqqissuussaq 11. decembari 2024-meersoq
Pisortat Pisiortortarneranni Neqerooruteqartitsinermi Maalaaruteqartarfik pillugu Inatsisartut inatsisaat nr. 7, 12. juuni 2019-imeersumi § 3, imm. 2 naapertorlugu ataani allaqqasut inissititerneqarput:
§ 1. Maalaaruteqartarfiup allakkatigut taasinermi ataatsimiinnerminnilu aalajangiisassapput.
Imm. 2. Ataatsimiinnerit siulittaasup pisariaqartippagu ingerlanneqartassapput. Ataatsimiinnerit digitalimik ingerlanneqassapput.
Imm. 3. Ataatsimiinnernut kingusinnerpaamik ullut 14-it sioqqullugit aggersaasoqartassaaq, tassani siulittaasoq nammineq suliat piaartuunerinut tunngatillugu aaliangiisinnaanngippat.
Imm. 4. Ataatsimiigiaqqusinermi ullormut oqaluuserisassat ilanngunneqariissapput, tassanilu sapinngisamik suliat pisariaqartinneqartumik, ilanngussassartai ilanngutereerlugit, suliarineqartussat allanneqareersimassapput.
Imm. 5. Ataatsimiinnerit kalaallisut, danskisut imaluunniit oqaatsit taaneqartut tamarmik atorlugit ingerlanneqarsinnaavoq. Oqalutseqarnissaq pisariaqartinneqarpat, tamanna Allatseqarfimmut ataatsimiinnginnermi ullut qulit sioqqullugit nalunaarutigineqassaaq.
Imm. 6. Allatseqarfik ataatsimiinnermi taasisinnaatitaanani peqataassaaq.
§ 2. Siulittaasoq Inatsisartut Inatsisaat naapertorlugu oqaasiinnakkut isumaqatiginninniarnissamut ingerlatsissalluni aaliangerpagu, suliami illua-tungeriit suliamilu peqataatinneqartut ataatsimiinnermi kisimi ilassuteqarsinnaanerat apeqquteqarsinnaanerallu pinerullugit peqataatinneqarnissai isumannaarneqaqqaassaaq.
Imm. 2. Oqaasiinnakkut isumaqatiginninniarnermi suliami allakkatigut uppernarsaatit aalajangiisartunit ilisimaneqaqqaassapput
Imm. 3. Illua-tungeriinni oqaasinnakkut isumaqatiginninniarnermut peqataasoqanngitsoorpat, taava aalajangiisartut suliami tunngavigineqartut tunngavigalugit aalajangiisinnaassaaq.
§ 3. Siulittaasoq Inatsisartut inatsisaat naapertorlugu ilaasortanik peqataatitaqarani maalaarutigineqartoq pillugu aalajangiiguni, allatseqarfiup aalajangiisartunut tamanna ilisimatitsiissutigissavaa.
§ 4. Allatseqarfiup maalaarutip aalajangiisartunut piareersarneqarnera isumagisassavaa, assersuutigalugu maalarummut akilersuummik akiliisitsineq, suliami illua-tungiliuttunit paasissutissanik uppernarsaatinillu noqqaassuteqarneq, aalajangiisartut aalajagniussassaannik suliaqarneq, ataatsimiigiaqqusinerit il.il.
Imm. 2. Allatseqarfiup passissutissanik il.il. nassiussinermi akissuteqarnissamut killigititassamik inissiisinnaavoq.
Imm. 3. Allatseqarfiup illua-tungeriit Inatsisartut Inatsisaat naapertorlugu paasissutissat tamaasa pillugit ilisimatitsiisarnissaminut isumannaarisassaaq.
Imm. 4. Allatseqarfiup aalajangiisartut aalajangiussai avammut saqqummiuttassavai. Allatseqarfiup aamma aalajangiisartunut saaffiginnissutit akissuteqarfiginissaannik suliaqartassaaq.
§ 5. Aalajangiisartuni ilaasortaq, pisortatigut ingerlatsinermi suliarinnittarneq pillugu inatsisartut inatsisaat naapertorlugu attuumavallaarneq peqqutaalluni, aalajangiussaqaqqusaanngilaq, aalajangiinermi peqataaqqusaanngilaq imaluunniit suliami suliarinninnermi peqataaqqusaanani.
Imm. 2. Ilaasortaq suliamut tunngatillugu attuumavallaarsoraluni nalornileruni, tamanna Allatseqarfimmut piaartumik nalunaarutigalugu anngutissavaa.
Imm. 3. Aalajangiisartut ilaasortanik peqataasoqaratik aalajangiisassapput, tassani attuumavallaarneq peqqutaappat.
§ 6. Aaalajangiisartuni ilaasortat tamarmik pisortat ingerlatsineranni suliassat suliarineqartarnerat pillugu inatsisartut inatsisaanni nipangiussisussaatitaaneq pillugu malittarisassat malillugit nipangiussisimasussaatitaapput. Nipangiussisussaatitaaneq paasissutissanut tamanut tunngassuteqarpoq, tassani ilaasortaq pineqartoq, imaluunniit suliami ilisimasalik maalaaruteqartarfimmi paasissutissat atorlugit, assersuutigalugu suliffeqarfimmi aningaasaqarneq suliffeqarfimmilu pissutsit, aamma suliffeqarfimmut paasissutissat tunngassuteqarsinnaasut allat pillugit, suliaqarnermini ilisimalikkani.
Jakob Julskjær
Pisortat Pisiortortarneranni Neqerooruteqartitsinermi Maalaaruteqartarfiup siulittaasua
Atuisartoqarnermut Unammilleqatigiinnermullu Aqutsisoqarfik
Forbruger- og Konkurrencestyrelsen
Imaneq 29, 1. sal
Postboks 689
3900 Nuuk
Neqerooruteqartitsisarnermi Maalaaruuteqartarfimmiik saqqummiussat
Royal Greenland A/S Illuatungeralugu Unammilleqatigiinnermi aalajangiisartut
Unammilleqatigiinnermi Aalajangiisartut ukiumoortumi nalunaarutaat 2010